• १६ चैत्र २०८०, शुक्रबार
  •      Fri Mar 29 2024
  •   Unicode
Logo
Latest
★   पञ्चकोटमा रहेको गरुड शिला र पृष्ठभूमिका हिमशृङ्खला ★   अझै तीन दिन पानी पर्ने, आज चट्याङको सम्भावना ★   शुक्रबार सन्तोषी माता, वैभवलक्ष्मी र शुक्र भगवानको पूजा–आराधना गर्नुहोस् ★   सत्ताका गाँठागुठीमा साना दलको च्याँखे दाउ ★   राजस्थानको लगातार दोस्रोे जित, दिल्लीलाई १२ रनले हरायो ★   उत्तरपुस्तिका हराएको विषयमा छानबिन गर्न उच्चस्तरीय समिति गठन ★   शिक्षा मन्त्रालयका बीस कर्मचारीलाई स्पष्टीकरण ★   मन्त्रिपरिषद्को बैठक: सचिव पदमा लम्सालको बढुवा,चैते धानको मूल्य निर्धारण  ★   नेपालको पर्यटकीय सम्भावनालाई विश्वमा प्रचार गर्नसके चार गुणा पर्यटक आउँछन्: सांसद राणा ★   इलाम २ मा रास्वपाका उम्मेदवार मिलन लिम्बू

ग्रहले के गर्ला २०७९ सालमा ? (भिडियोसहित)



यस वर्ष ६० संवत्सरमध्येका पचासौँ अर्थात् नल संवत्सर रहेका छन् । नल संवत्सरले जनसंख्या बृद्धि गराउँछ । यस वर्षका राजा शनि हुन् । शनि पश्चिमदिशाको मालिक मानिन्छन् । नेपालमा पश्चिमी देशहरुको हावि रहनेछ । शनिले निर्माणका सामग्री, सेवा, न्याय, जीर्णोद्धारसँग सम्बन्ध राख्ने हुँदा यससँग सम्बन्धित भएर पश्चिमाहरु नेपाल प्रवेश गर्ने छन् ।

सरकार निर्माणका कार्यमा अगाडि बढे पनि शनि र मंगलको नक्षत्र ज्येष्ठ १७ गतेदेखि बक्र भई कर्तिक ३ गतेसम्म नक्षत्र संयोग हुँदा कथनी र करणीमा समानता हुने छैन । आँखामा छारो हालेर लोकप्रियता कमाउनका लागि नेतृत्वपंक्ति लाग्नेछ ।

शनि त्यसमाथि पनि वक्र भएकाले हरेक कार्य समयमा सकिँदैन । यो पीडादायी ग्रह भएकाले निर्माणका कार्यबाट लाभ भन्दा पनि बजेटको दुरुपयोग हुने संभावना पनि उत्तिकै रहने छ । शनि माघ २७ गतेसम्म मकर राशिमा रहने हुँदा हुरी बतासको प्रकोप, अर्थहीन विषयका निर्णयले प्राकृतिक र राजनैतिक समस्या हुनसक्नेछ । नेपालको वृश्चिक राशि भएकाले साढेसातको दशा यस वर्ष छैन ।

शनि माघ २७ गते कुम्भ अर्थात् आफ्नै मूलत्रिकोणमा पुग्ने हुँदा न्याय क्षेत्रमा सुधार गरी मित्रराष्ट्रसँगको सम्बन्धलाई मजबुत बनाउन सकिने उपयुक्त समय पनि छ । नेपालको ग्रहगोचरलाई हेर्दा माघ २७ सम्म तृतीय स्थानमा बसेका शनिले विद्यास्थान, भाग्यस्थान र खर्चस्थानलाई पूर्णरुपले देख्ने हुँदा तुक नभएका विषयलाई लिएर विवाद हुने, सम्पन्न गर्न लागेका राम्रा कार्यमा अलमल हुने र अनुत्पादक क्षेत्रमा ठूलो लगानी गर्ने अवस्था रहन सक्छ ।

माघ २८ गतेदेखि कुम्भ राशिमा पुगेका शनि नेपालको कुण्डलीमा चतुर्थस्थानमा पुग्ने छन् जसले आन्तरिक कलह बढाउन सक्छ, उत्पादनका कार्य वा व्यवसायिक क्षेत्रमा नोक्शान गराउँदै अनावश्यक विषयले तनाव सृजना गर्न सक्छ । पश्चिमी देशमा रहेका नेपालीलाई पीआर दिलाउन भने यो वर्ष राम्रो अवसर मिल्नेछ ।

शनिका सम वृहस्पति र वृहस्पतिका सम शनि हुँदा केन्द्र र प्रदेशबीच खासै खिचातनी नभए पनि यिनीहरु वक्र हुँदाका अवस्थामा राष्ट्रलाई लाभ हुने कार्य गर्न सक्दैनन् ।

यस वर्ष मन्त्रीपदमा गुरु अर्थात् वृहस्पति छन् । मीन राशिमा बसेका गुरु श्रावण १२ गतेदेखि मंसीर १० गतेसम्म बक्र रहने छन् । विद्या, धर्म र न्यायका क्षेत्रमा सकरात्मक प्रभाव रहने भए पनि जलराशि एवं वक्र हुँदा अवश्य पनि भनेजस्तो कार्य गर्न सक्दैनन् । उपदेशका कारक मानिने गुरु नै वक्र हुँदा बौद्धिक व्यक्तिहरुले विद्वत्तालाई सदुपयोग गर्न नसक्ने अवस्था आउन सक्छ ।

पद, प्रतिष्ठामा अलमलिन सक्ने, स्वार्थका लागि आफ्नो ज्ञानलाई प्रयोग गर्ने अवस्था रहन्छ । शैक्षिक क्षेत्र फस्ष्टाएको जस्तो देखिए पनि मात्रात्मक रुपमा वृद्धि गुणात्मक रुपमा कमजोर हुन सक्छन् । पुराना मन्दिरहरु जीर्णोद्धार भए पनि विधि मिचिने, पद्धतिलाई भुल्ने हुन सक्छ । धार्मिक अनुष्ठानबाट प्रजा, प्रकृतिको संरक्षण भन्दा पनि आयोजक र वाचकमण्डलकै लागि लाभकारी हुने अवस्था देखिन्छ । अस्थिरता चाहनेहरूबाट गोप्यरुपमा द्वन्द्व बढाउने सम्भावना रहे पनि राजा सेवादायी, मन्त्री धर्म परायण हुँदा केही आस गर्ने अवस्था रहन्छ । साउन १२ देखि कार्तिक ३ गतेसम्म राजा शनि एवं मन्त्री गुरु दुवै बक्र हुँदा अपेक्षाकृत कार्य हुन सक्दैन । राजनीतिकर्मीहरुले विश्वास गुमाउन सक्छन् ।

यस वर्ष असार १७ देखि भाद्र १ गतेसम्म राहू र मंगलको भेट रोग स्थानमा हुन्छ । वैशाखपूर्व नै मेषराशिमा प्रवेश गरेका राहू नेपालको छैटौँ स्थानमा रहने हुँदा भाइरसजन्य रोगहरु बढ्न सक्छन् । जसले गर्दा यही अवधिमा रोग, जमिनसम्बद्ध विवादले दक्षिण र नैऋत्यदिशामा अल्झन आउन सक्छ । मंगल दक्षिणदिशाका स्वामी, राहू नैऋत्यदिशाका स्वामी हुन् ।

मंगलले जमिन, सेना, विवाद आदिलाई बुझाउँछ । यसकारण दक्षिणतर्फका सिमानामा यी अवस्था आउन सक्छन् । शत्रुस्थानमा क्रुर ग्रह हुँदा शुत्रलाई तह लगाउन सजिलो परे पनि मंगलदेखि सचेत रहनुपर्छ । लग्न, तृतीय र छैटौँस्थानमा बसेका मंगलले विचारै नगरी एक्सन लिन सक्छ जसमध्ये नेपालको छैटौँ स्थानमा मंगल पुग्दै छ । माघ २८ गतेदेखि शनिको पूर्णदृष्टि रोग स्थानमा रहेका राहुमाथि पर्ने हुँदा यतिबेला नैऋत्यकोण र पश्चिमदिशामा नेपालले चनाखो हुनुपर्ने अवस्था ग्रहले देखाएको छ । खर्चस्थानमा पुगेका केतुले पूरातन शिक्षा, कला आदिमा लगानी गर्दा, धर्मसंस्कृतिमा ध्यान दिँदा लाभ पुग्न सक्छ ।

कार्तिक ८ गते खण्डग्रास सूर्य ग्रहण एवं २२ गते कार्तिकमा खग्रास चन्द्रग्रहण लाग्ने हुँदा सचेत रहनुपर्ने समय छ । माघ २७ गतेसम्म धनुलाई अन्त्य, मकरलाई मध्य र कुम्भलाई अद्य साढेसाती एवं यही अवधिमा तुला तथा मिथुनलाई अढैया शनि रहनेछ । त्यसपछि मकरलाई अन्त्य, कुम्भलाई मध्य र मीनलाई अद्य साढेसाती दशा शुरु हुनेछ ।

यही अवधिमा बृश्चिक र कर्कटलाई अढैया दशाले असर गर्ने छ । नेपाललाई पनि माघ २८ गते अढैया दशाको प्रभाव रहने छ । जन्मकुण्डलीमा शनिको बसाई उपयुक्त स्थानमा भए उपलब्धी हात लाग्ने छ अन्यथा सजग र सचेत रहनुपर्छ ।

साधुसन्तको सेवा, दीनदुःखको सेवा, तुलसी–शालग्रामको पूजा वा शनिवार पीपलको दर्शन एवं पूजाले शनिको प्रभावलाई कम गर्न सकिन्छ । परिश्रम, दृढसंकल्प, कुल र इष्टदेवप्रतिको विश्वासले ग्रहका असरलाई कम हुन्छन् । नेपालले मन्त्र, तन्त्र र यन्त्रलाई जगायो, जोगायो र जगत्मा फैलायो । यसकारण प्रतिकूल ग्रहलाई अनुकूल बनाउन, विपरीत परिस्थितलाई सहज तुल्याउन कूललाई पुजौँ, मूललाई बुझौँ, राष्ट्रहितमा आफूलाई समर्पित गरौँ ।