काठमाडौँ । मंगलबार शेयर बजार मापक नेप्से परिसूचक उच्च अंकले गिरावट आएको छ ।
सोमबार सामान्य अंकले गिरावट आएको नेप्से सूचक ४६.४६ अंकले घटेर २४५२.०६ विन्दुमा झरेको छ । त्यस्तै सेन्सेटिभ इण्डेक्स ८.३४ अंक घटेको छ भने फ्लोट इण्डेक्स २.८८ अंक र सेन्सेटिभ फ्लोट इण्डेक्स २.२५ अंकले गिरावट भएको छ ।
मंगलबार कारोबारमा आएका २२८ कम्पनीको ५८ लाख ४१ हजार ९९८ कित्ता शेयर २ अर्ब ६७ करोड १२ लाख ३२ हजार २८८ रुपैयाँमा खरिद बिक्री भएको छ । नेप्सेमा गिरावट आए पनि कारोबार रकम भने बढेको छ । अघिल्लो कारोबारको दिन डेढ अर्बको कारोबार भएको थियो ।
नेप्सेका १३ उपसमूहमा होटल उपसमूह बाहेक अन्य १२ वटा उपसमूहको सूचक नकारात्मक देखिएको छ ।
त्यस्तै, भर्खरै शेयर बजारमा सूचिकृत भएको नेश्डो लघुवित्त र राष्ट्र उत्थान लघुवित्तको शेयरमूल्य सकारात्मक सर्किट लागेको छ । जाल्पा लघुवित्त र युनिलिभर नेपालको शेयर मूल्य ३ प्रतिशत भन्दा बढीले बढेको छ । यस्तै इमर्जिङ्ग नेपालको शेयरमूल्य सबैभन्दा धेरै १० प्रतिशतले घटेको छ भने नारायणी डेभलपमेन्ट बैंकको ६.३७ प्रतिशत, युनाइटेड इदि मर्दी ६.०१ प्रतिशतले घटेको छ ।
कारोबारको हिसावमा हिमालयन डिस्टिलरीको सबैभन्दा धेरै ९ करोड ६७ लाख रुपैयाँ बराबरको शेयर कारोबार भएको छ । नविल बैंकको ८ करोड ५९ लाख, नेपाल लाइफको ८ करोड १३ लाख रुपैयाँको शेयर कारोबार भएको छ ।
