काठमाडौं । इन्डियन प्रिमियर लिग (आईपीएल) २०२२ सुरु हुनु दुई दिनअघि चेन्नई सुपर किङ्ग्स टिमको नेतृत्वमा ठूलो परिवर्तन भएको छ ।
महेन्द्र सिंह धोनी चेन्नई सुपर किंग्सको कप्तान हुने छैनन् । चेन्नईले आफ्नो ट्वीटर अकाउन्टबाट यो जानकारी दिएको हो । उनले टोलीको कप्तानी छाडेका छन् । उनको स्थानमा रविन्द्र जडेजाले जिम्मेवारी सम्हाल्नेछन् । जडेजा सन् २०१२ देखि चेन्नई सुपर किंग्सको टोलीमा रहेका छन् । चेन्नईले धोनीको कप्तानीमा ४ पटक आईपीएलको उपाधि जितेको छ ।
जडेजालाई फ्रेन्चाइजले १६ करोडमा राखेको थियो । योसँगै धोनीले यो सिजन १२ करोड पाएका छन् । यसअघि पनि जडेजालाई कप्तान बनाइने अनुमान गरिएको थियो । उनी बाहेक मोइन अलीलाई ८ करोड र ऋतुराज गायकवाडलाई ६ करोडमा रिटेन गरिएको थियो ।
धोनीले चेन्नईका लागि २१३ खेलमा कप्तानी गरेका छन् । उनको कप्तानीमा टोलीले १३० खेल जितेको छ । यसबीचमा सुरेश रैनाले ६ खेलमा कप्तानी पनि गरेका थिए जसमध्ये टोलीले २ खेल मात्र जितेको थियो । यी दुई बाहेक टोलीमा कप्तान छैनन् । कप्तानमा यो ठूलो फेरबदलको निर्णय प्रतियोगिता सुरु हुनु दुई दिनअघि चेन्नईको व्यवस्थापनले गरेको हो ।
यस संस्करणको आईपीएल यही मार्च २७ तारिखदेखि सुरु हुँदैछ । पहिलो खेलमा चेन्नई र कोलकाता नाइट राइडर्स खेल्दैछन् ।
