एजेन्सी । कोरोना महामारीका कारण पटक–पटक स्थगित भएको फिल्म ‘आरआरआर’ अन्ततः भोलि शुक्रबारदेखि विश्वव्यापी रुपमा रिलिज हुँदैछ ।
यो फिल्मसँगै कुनै पनि हिन्दी फिल्म रिलिज भएको छैन । यो फिल्म हिन्दी बाहेक तमिल, मलयालम र कन्नड भाषामा पनि रिलिज हुँदैछ ।
यसैबीच, फिल्म ‘आरआरआर’ले अघिल्लो वर्ष रिलिज भएको अल्लु अर्जुनको फिल्म ‘पुष्पा द राइज’को कीर्तिमान तोडेको छ । त्यतिमात्र नभई यस वर्ष पवन कल्याणको फिल्म ‘भिमला नायक’ जसले धेरै अग्रिम बुकिङको कीर्तिमान बनाएको थियो त्यसको रेकर्ड समेत आरआरआरले तोडेको छ ।
चलचित्र ‘आरआरआर’ले बुधबार अग्रिम बुकिङमा ७ करोडको आँकडा पार गरेको छ । फिल्म रिलिज हुनुअघि नै बक्स अफिसमा तेलुगु फिल्मको सबैभन्दा ठूलो बुकिङ भएको बताइएको छ ।
यसअघि तेलुगु फिल्मको सबैभन्दा धेरै अग्रिम बुकिङको कीर्तिमान यसै वर्षको फेब्रुअरीमा रिलिज भएको फिल्म ‘भिमला नायक’ले बनाएको थियो, जसले अग्रिम बुकिङबाट ६।३० करोड कमाएको थियो ।
हिन्दी भाषी राज्यमा फिल्मले करिब १५ करोडको ओपनिङ लिन सफल हुने विश्वास गरिएको छ । फिल्मले तमिल, मलयालम र कन्नड संस्करणबाट पनि पहिलो दिन करिब १० करोडको ओपनिङ गर्ने अपेक्षा गरिएको छ ।
कुनै पनि भारतीय फिल्मको अहिलेसम्मकै सबैभन्दा ठूलो ओपनिङ डेको इतिहास हेर्दा यो आँकडा निर्देशक एसएस राजामौलीकै फिल्म ‘बाहुबली २’ को नाममा छ । फिल्मले पहिलो दिनमा सबै भाषाको संस्करणसहित १२१ करोडको ओपनिङ गरेको थियो ।
एसएस राजामौलीको निर्देशनमा ४०० करोड बढी बजेटमा बनेको यो फिल्ममामा जुनियर एनटीआर, रामचरण, अजय देवगण, आलिया भट्ट लगायतको अभिनय छ ।
