क्रेमलिनका प्रवक्ता दिमित्री पेस्कोभले आफ्नो अस्तित्व खतरा पर्यो भने मात्र रुसले आणविक हतियार मात्र प्रयोग गर्ने बताएका छन् ।
पेस्कोभको टिप्पणी सीएनएन अन्तर्वार्ताकार क्रिस्टियन अमानपुरले उनलाई राष्ट्रपति भ्लादिमिर पुटिनले युक्रेनी सन्दर्भमा आणविक विकल्प प्रयोग गर्दैनन् भन्ने कुरामा ‘आश्वस्त वा विश्वस्त’ छन् छैनन् भन्नेबारे प्रश्न गरेपछि आएको हो ।
“हामीसँग घरेलु सुरक्षाको अवधारणा छ र यो सार्वजनिक छ। तपाईंले आणविक हतियार प्रयोग गर्नुको सबै कारणहरू पढ्न सक्नुहुन्छ”, पेस्कोभले मङ्गलबार भने, “यदि यो हाम्रो देशका लागि अस्तित्वको खतरा हो भने यसलाई हाम्रो अवधारणा अनुसार प्रयोग गर्न सकिन्छ।”
पुटिनले गत महिना रुसको आणविक सेनालाई उच्च सतर्कतामा राख्न आदेश दिएका थिए।
आदेशअनुरूप रूसको रक्षा मन्त्रालयले फेब्रुअरी २८ मा आफ्नो आणविक क्षेप्यास्त्र सेना तथा उत्तरी र प्यासिफिक फ्लीटहरू बढाइएको र लडाकूलाई ड्युटीमा राखिएको बताएको थियो ।
संयुक्त राष्ट्रसङ्घका महासचिव एन्टोनियो गुटेर्रेसले मार्च १४ मा आणविक द्वन्द्वको सम्भावना कुनैबेला अकल्पनीय थियो, अब सम्भावनाको दायरामा फर्किएको छ बताए।
पुटिनले युक्रेनमा रासायनिक र जैविक हतियारहरू प्रयोग गर्नेबारे विचार गरिरहेको अमेरिकी राष्ट्रपति जो बाइडेनले चेतावनी दिएपछि यस्ता टिप्पणीहरू आएका हुन् । किनकी बाइडेनले मस्कोको रणनीतिलाई बढ्दो ‘क्रूर’ को सङ्ज्ञा दिए।
गत हप्ता रुसले आफ्नो किन्जल (डागर) हाइपरसोनिक मिसाइल प्रक्षेपण गरेको बताएको थियो जसले पृथ्वीको जुनसुकै ठाउँमा एक घण्टाभित्रमा निशाना ठोक्न सक्छ।
पुटिनले डिसेम्बरमा भनेका थिए, “रुस हाइपरसोनिक क्षेप्यास्त्रमा विश्वव्यापी नेता हो, जसको गति, चाल र उचाईले तिनीहरूलाई ट्र्याक गर्न र अवरोध गर्न गाह्रो बनाउँछ।”
किन्जल मिसाइलहरू सन् २०१८ मा लन्च गरिएको हतियारहरूको शृङ्खलाको एक भाग हो। रूसले पहिलो पटक सन् २०१६ मा सिरियामा आफ्नो सैन्य अभियानका क्रममा हाइपरसोनिक मिसाइल प्रयोग गरेको थियो।
रुस–युक्रेन युद्धले शीतयुद्धपछिको विश्वव्यापी सुरक्षा सहमतिलाई हल्लाएको छ, प्रमुख बालीहरूको विश्वव्यापी आपूर्तिमा अवरोध पुर्याएको छ र यसले आणविक दुर्घटना हुनसक्ने चिन्ता बढाएको छ।
