काठमाडौँ । नेकपा (एमाले)का महासचिव शङ्कर पोखरेलले गत वर्ष भएको ‘जेनजी आन्दोलन’का क्रममा शान्तिपूर्ण प्रदर्शनलाई हिंसात्मक बनाउन घुसपैठ गर्ने तथा गराउने योजनाकार र षड्यन्त्रकारीको पहिचान गरी कानुनी कारबाही गर्नुपर्ने बताएका छन्।
जेनजी आन्दोलनका क्रममा ज्यान गुमाएका युवाप्रति श्रद्धाञ्जली अर्पण गर्दै पोखरेलले घाइते तथा सन्तान गुमाएका परिवारप्रति समवेदना व्यक्त गरेका छन्। आन्दोलनको एक वर्ष पूरा भएको अवसरमा मंगलबार सामाजिक सञ्जालमार्फत धारणा सार्वजनिक गर्दै उनले शान्तिपूर्ण प्रदर्शनलाई सुरुदेखि नै नियोजित रूपमा भड्काएर हिंसात्मक बनाउने षड्यन्त्र भएको दाबी गरेका हुन्।
पोखरेलका अनुसार आन्दोलनका क्रममा नवयुवाहरूले उठाएका भ्रष्टाचार नियन्त्रण, सुशासन कायम, सेवा प्रवाहलाई सहज बनाउने तथा सामाजिक सञ्जालको निर्वाध प्रयोग गर्न पाउने माग जायज थिए। उनले यी विषयलाई सबैको साझा सरोकारका विषय भएको बताएका छन्।
उनले तत्कालीन सरकारले सामाजिक सञ्जालमाथि प्रतिबन्ध नलगाएको, बरु सामाजिक सञ्जाललाई नेपालमा दर्ता गराउने नीति अघि बढाएको दाबी गरेका छन्। तर उक्त नीतिबारे सरकारले स्पष्ट रूपमा बुझाउन नसक्दा सामाजिक सञ्जालमा अभ्यस्त नयाँ पुस्ता सडकमा आउन पुगेको उनको भनाइ छ।
नवयुवाहरूको शान्तिपूर्ण प्रदर्शनलाई सुरुदेखि नै नियोजित रूपमा भड्काएर हिंसात्मक बनाउने सुनियोजित षड्यन्त्र भएको थियो भन्ने कुरा अब घामजस्तै छर्लङ्ग भइसकेको छ,’ पोखरेलले लेखेका छन्।
शान्तिपूर्ण प्रदर्शनमा घुसपैठ गर्ने र गराउने योजनाकार तथा षड्यन्त्रकारीको पहिचान गरी कानुनी कारबाहीको दायरामा ल्याउनु नै जेनजी आन्दोलनको वास्तविक भावनाको सम्मान हुने उनले बताएका छन्।
वर्तमान सरकार जेनजी आन्दोलनको भावनाअनुसार नभई आन्दोलनलाई ‘हाइज्याक’ गर्नेहरूको योजना र प्रभावमा चलेको आरोप पनि पोखरेलले लगाएका छन्। यस्तो अवस्थामा नवयुवाको वास्तविक भावनाको कदर, मुलुकमा सुशासनको प्रत्याभूति र विधिको शासन स्थापना गर्नु प्रमुख आवश्यकता रहेको उनको भनाइ छ।
एमाले नवयुवाको भावना र जायज माग सम्बोधन गर्न उनीहरूसँग मिलेर अघि बढ्न प्रतिबद्ध रहेको पोखरेलले बताएका छन्। उनले एमाले हिजो पनि नवयुवाको पक्षमा रहेको, आज पनि रहेको र भविष्यमा पनि रहने दाबी गर्दै विगतमा उनीहरूको भावना र माग सम्बोधनमा कमजोरी भएको भए त्यसलाई सुधार गर्दै अघि बढ्ने प्रतिबद्धता व्यक्त गरेका छन्।
