पर्सा। वीरगञ्ज महानगरपालिकाका तीन वटा वडामा चार वर्षदेखि निकास हुन नसकेको नालालाई निकास दिइएको छ ।
महानगरले लामो समयदेखि नाला अवरुद्ध हुने समस्या रहेकामा नाला निर्माण तथा सफाइ गरेपछि पानीको सहज निकासको व्यवस्था गरिएको हो ।
वीरगञ्ज-१७, २५ र २६ मा चार वर्षदेखि वर्षाको समयमा नाला अवरुद्ध हुने समस्या रहँदै आएको थियो । पानी निकास नहुँदा वर्षायाममा वडा नं १७, २५ र २६ अन्तर्गत अलाैँ, सिर्सिया, सुगौलीलगायत आसपासका बस्ती डुबानमा पर्दै आएपछि महानगरका प्रमुख राजेशमान सिंहको पहलमा सफाइको काम अघि बढाइएको हो ।
यसअघि नालाका कारण सडक डुबानमा परेपछि आवतजावत प्रभावित हुनुका साथै खेतीयोग्य जमिनमा समेत असर पर्ने गरेको महानगरका प्रमुख प्रशासकीय अधिकृत वसन्तबहादुर बोहराले बताउनुभयो । समस्या समाधानका लागि वीरगञ्ज महानगरको टोली स्थलगत रूपमा खटिनुका साथै निकास क्षेत्रको निरीक्षण गर्दै पानीको बहावमा रहेका अवरोध हटाउने काम अघि बढाएको थियो ।
पानी जम्ने समस्याका कारण आवागमन प्रभावित हुनुका साथै बस्तीमा लामखुट्टेको जोखिम बढ्ने, दुर्गन्ध फैलिने तथा विभिन्न स्वास्थ्य समस्या निम्तिने गरेको थियो । महानगरले पानीको नियमित निकास भएपछि बस्ती तथा खेतीयोग्य जमिनमा हुने डुबान कम हुने जनाएको छ । रासस
