काठमाडौंः अन्तर्राष्ट्रिय बजारमा पेट्रोलियम पदार्थको मूल्यवृद्धि भएसँगै नेपाल आयल निगमले आज बिहीबार रातिदेखि लागू हुने गरी पेट्रोल र डिजेलमा प्रति लिटर पाँच रुपैयाँ मूल्यवृद्धि गरेको छ भने हवाई इन्धनमा पनि मूल्य समायोजन गरिएको छ ।
निगमका अनुसार अब काठमाडौंमा पेट्रोल प्रति लिटर रु. १५० र डिजेल १३३ कायम भएको छ । तर खाना पकाउने एलपी ग्याँसको मूल्यमा प्रति सिलिन्डर ६६५ घाटा भए पनि यसको मूल्य भने यथावत राखिएको निगमले जनाएको छ ।
पछिल्लो समय रसिया र युक्रेनबीच युद्ध शुरु भएपछि अन्तर्राष्ट्रिय बजारमा कच्चा तेलको मूल्य प्रति ब्यारेल १२० पुगिसकेको अन्तर्राष्ट्रिय संचार माध्यमहरुले जनाएका छन् ।
यसैबीच, निगम संचालक समितिले मूल्य समायोजनसँगै निगमका स्थायी कर्मचारीलाई उपलब्ध गराउँदै आएको पोशाक संरक्षण खर्च कटौती गर्ने तथा मूल्य संरचना मार्फत प्रतिशतमा दिइँदै आएको विक्रेता कमिसनलाई हाललाई २०७८ फागुन ७ मा कायम भए अनुरुप यथावत राख्ने निर्णय गरेको छ ।
निगमले मूल्य समायोजन गरिए पनि १५ दिनमा निगमलाई २ अर्ब ५० करोड घाटा लाग्ने जनाएको छ । चालु आर्थिक वर्षको फागुन मसान्तसम्ममा निगमलाई करिब २८ अर्ब नोक्सानी हुने देखिएपछि भारतीय आयल निगमलाई भुक्तान गर्नुपर्ने करिब पाँच अर्ब रुपैयाँ निगमले नेपाल सरकारसँग माग गर्न लागेको पनि निगमको भनाई छ ।
