काठमाडौ । दोस्रो संस्करणको नेपाल सुपर लिग (एनएसएल) को लागि खेलाडी किनबेच (अक्सन) शुक्रबार सकिएको छ । २ सय ४२ खेलाडी सहभागी रहेका अक्सनमा विभिन्न १० फ्रेन्चाईज टोलीले खेलाडी अनुबन्ध गरेका छन् । आयोजक नेपाल स्पोर्टस एण्ड इभेन्ट म्यानेजमेन्टले आयोजना गरेको अक्सनमा अघिल्लो सिजन एफसी चितवनका मार्की खेलाडी भरत खवासलाई कुनै पनि टोलीले बोलकबोल गरेनन् । ए क्याटोगोरीमा रहेका भरत र नवयुग श्रेष्ठको न्युनतम मुल्य १ लाख ५० हजार रुपैयाँ र अधिकतम मुल्य ३ लाख ५० हजार रहेको थियो । तर कुनेै पनि टोलीले उनीहरुमाथि बोली लगाएनन् ।
त्यस्तै ए क्याटोगोरीमै रहेका थ्री स्टार क्लबका कप्तान विक्रम लामा र लिग विजेता मच्छिन्द्र फुटबल क्लबका स्ट्राइकर अभिषेक रिजाललाई भित्राउन कुनेै क्लब इच्छुक देखिएनन् । अभिषेकले गत सिजन बुटबल–लुम्बिनी एफसीबाट खेलेका थिए । ए क्याटोगोरीमै रहेका राष्ट्रिय टोलीका स्ट्राइकर सुमन लामा प्रारम्भिक चरणमा अनसोल्ड रहे पनि विस लिस्टबाट न्युनतम मुल्य १ लाख ५० हजार रुपैयाँमा काठमाडौं रेजर्समा अनुबन्धन भए ।
अक्सनका लागि नाम दर्ता गराएका २ सय ४२ खेलाडीलाई तीन क्याटोगोरीमा विभाजन गरिएको थियो । जसअन्तर्गत ए क्याटागोरीमा ४९, बी क्याटागोरीमा १ सय १ र सी क्याटागोरीमा पनि १ सय १ खेलाडीहरु रहेका थिए ।
ए क्याटोगोरीमा रहेका खेलाडीको न्युनतम मुल्य एक लाख ५० हजार र अधिकतम मुल्य ३ लाख ५० हजार रुपैयाँ रहेको थियो । ए श्रेणीका खेलाडीका लागि सहभागी १० क्लबले एक पटक गोल्डेन बजरको थिच्न पाउने प्राबाधान राखिएको थियो । जसमा क्लबले सो खेलाडीलाई अधिकतम ३ लाख ५० हजार रुपैयाँमा खरिद गर्ने प्राबधान राखिएको थियो ।
गोल्डेन बजरमार्फत राष्ट्रिय टोलीका रक्षक सुमन अर्याल बुटवल–लुम्बिनी एफसी, गोलकिपर दिप कार्की विराटनगर एफसी, सुनिल बल काठमाडौं रेजर्स, दिनेश राजवंशरी पोखरा थन्डर्स, मान बहादुर तामाङ विरजंग युनाइटेड, पुजन उपरकोटी धनगढी एफसी, निशान खड्का झापा एफसी, विशाल सुनार ललितपुर सिटी एफसी र गौतम श्रेष्ठ स्पोर्टिङ इलाम एफसीले अनुबन्धन गरेका थिए ।
एनएसएलको दोस्रो संस्करण चैत २६ देखि जेठ ७ गतेसम्म काठमाडौं र पोखरा गरी दुई शहरमा आयोजना हुँदै छ । १० टोलीबीच प्रतिस्पर्धा हुने प्रतियोगितामा यस सिजन तीन टोली समावेश गरिएको छ । अघिल्लो सिजन १० टोलीले प्रतिस्पर्धा गर्दा काठमाडौं रेजर्सले धनगढी एफसीलाई फाइनलमा १–० ले पराजित गर्दै च्याम्पियन भएको थियो ।
