काठमाडौं । इन्धनमा गरिएको मूल्यबृद्धिको बिरोधमा नेत्र विक्रम चन्द ‘विप्लव’ नेतृत्वको नेपाल कम्युनिष्ट पार्टीको आह्वान भएको नेपाल बन्दको प्रभाव न्यून परेको छ । सार्बजनिक सबारीका साधनहरु थोरै मात्रामा चलेका छने भने निजी सवारीहरु निर्वाध रुपमा संञ्चालन भएका छन् । बन्दलाई मध्यनजर गर्दे ठूलो संख्यामा प्रहरी परिचालन गरिएको छ । शिक्षण संस्थाहरुमा भने बन्दको असर देखिएको छ ।
यसैबीचनेपाल बन्द गराउन सडकमा खटिएका नेकपाका ११ जना कार्यकर्ता दमौलीबाट पक्राउ परेका छन् । आज बिहानैदेखि नेपाल बन्द गराउन सडकमा खटिएका विप्लव निकट सो पार्टीका ११ जनालाई प्रहरीले पक्राउ गरेको हो ।
ट्राफिक चोकबाट जिल्ला सेक्रेटरी एटम, व्यास नगर इन्चार्ज ओम पन्त, मजदुर जिल्ला अध्यक्ष हिमाल खड्का, अखिल क्रान्तिकारी जिल्ला सचिव शिव सदाशङ्करलगायत पक्राउ परेको सो पार्टीका जिल्ला इञ्चार्ज पूर्णजित पुनले जानकारी दिनुभयो । पक्राउ परेका नेता कार्यकर्तालाई तत्काल रिहा गर्न उहाँले माग गर्नुभयो । नेपाल बन्दका कारण दमौली बजार बिहानैदेखि सुनसान छ ।
