जनकपुर । नेकपा (माओवादी केन्द्र) का अध्यक्ष पुष्पकमल दाहाल 'प्रचण्ड' अदालतमा देखिएको समस्या अदालत भित्रैबाट छिटो समाधान होस् भन्ने चाहेको बताउनु भएको छ ।
महोत्तरीको कार्यक्रममा भाग लिन जाने क्रममा जनकपुर बिमानस्थलमा सञ्चारकर्मीहरु संग दाहालले भन्नुभयो 'अदालतभित्र देखिएको समस्या त्यही भित्रबाट सुल्झियोस् भनेर हिजो बसेको सत्तारूढ पाँच दलीय गठबन्धन समन्वय समितिले सन्तुलित वक्तव्य जारी गरेको छ त्यसैले अब उक्त विषयमा बढी बोली राख्नु आवश्यक छैन ।'
सर्वोच्च अदालतमा देखिएको समस्या एक/दुई दिनभित्रै समाधान हुने अनुमान गर्दे उहाँले भन्नुभयो 'हिजो त हामीले बोल्यौं नि त। हिजो पाँच दलीय गठबन्धनको जो समन्वय समिति छ। त्यसको बैठक बसेको थियो र त्यो बैठकले अदालतमा देखा परेको समस्याप्रति गम्भीर ध्यानाकर्षण भएको, त्यो समस्याको छिटोभन्दा छिटो समाधान होस् भन्ने हाम्रो अपेक्षा रहेको र त्यसको निम्ति सबै पक्षले आ(आफ्नो ठाउँबाट समस्या समाधान गर्न पहल गर्ने आशा व्यक्त गरेको भनेर हामीले एउटा सन्तुलित वक्तव्य दिएका छौं।'
