काठमाडौं । सहिद स्मारक ‘ए’ डिभिजन लिग अन्तर्गत पहिलो चरणका खेलहरु सम्पन्न भएका छन् ।
सोमबार मछिन्द्र क्लब र न्युरोड टिम (एनआरटी) बीचको खेलसँगै पहिलो चरणको खेल सकिएका हुन् ।
पहिलो चरणका ७ खेल सकिदा चार टोलीले स्पष्ट जित निकाल्दै ३ अंक जोड्न सफल रहे । यस्तै ६ टोलीले एक अंक जोड्दा चार टोली भने पहिलो चरणमा अंक जोड्न सकेनन् ।
पहिलो चरण सकिँदा थ्री स्टार ३ अंकसहित शीर्ष स्थानमा रहेको छ । यस्तै ब्रिगेड ब्वाइज ३ अंकसहित दोस्रो स्थानमा रहेको छ भने मछिन्द्र समान ३ अंकसहित तेस्रो स्थानमा रहँदा उपाधि दाबेदार मनाङ मर्स्याङ्दी चौंथो स्थानमा रहेको छ ।
तालिकाको पाँचौं स्थानमा हिमालयन शेर्पा रहेको छ । समान १ अंक जोडेको त्रिभुवन आर्मी क्लब छैटौँ स्थानमा रहेको छ ।
यसैगरी तालिकाको सातौं स्थानमा नेपाल पुलिस रहँदा हिमालयन शेर्पासँग बराबरी खेल्दै अंक बाँडेको संकटा आठौं स्थानमा रहेको छ ।
यस्तै फ्रेन्ड्स नवौं, सातदोबाटो दशौं, एपीएफ एघारौंमा रहँदा एनआरटी, जावलाखेल र च्यासल क्रमश बाह्रौं, तेह्रौं र चौधौं स्थानमा रहेका छन् ।
मछिन्द्रका सुनिल बल र ब्रिगेड ब्वाइजका दिनेश राईले दुई/दुई गोल गरेका छन् ।
अब दोस्रो चरणको खेलहरु शुक्रबारबाट सुरु हुनेछन् ।
