![](https://newspolar.com/wp-content/uploads/2022/03/94925366_1310845455776772_2074806809872302080_n.jpg)
रामपुर पाल्पा, भदौ १० । जिल्लाका किसान यतिखेर व्यावसायिक मत्स्यपालनतर्फ आकर्षित भएका छन् ।
परम्परागत शैलीमा मत्स्यपालन गरेका किसानलाई व्यवसाय उन्मुख बनाउनका लागि जिल्ला कृषि विकास कार्यालयले प्राविधिक तथा आर्थिक सहयोग गर्न लागेपछि उनीहरु मत्स्यपालनतर्फ आकर्षित भएका हुन् ।
हावापानी, भौगोलिक भूवनोटका दृष्टिकोणबाट पहाडी जिल्ला भए पनि किसानले घरायसी प्रयोजनका लागि मात्र स–साना पोखरीमा जङ्गली जातका माछापालन गरेका छन् । किसानलाई व्यावसायिक सफलता गराउने उद्देश्यले आव २०७०-७१ देखि जिल्ला कृषि विकास कार्यालयले मत्स्यपालन कार्यक्रममार्फत सहयोग गरेपछि उनीहरुको थप आकर्षण बढेको हो ।
जिल्ला कृषि विकास कार्यालयले किसानलाई प्राविधिक तथा अन्य सामग्रीमा सहयोग गर्न लागेपछि अर्गली, बन्दीपोखरा, रामपुर, हुँगी, कसेनी, दोभान, सोमादी क्षेत्रमा किसानले व्यावसायिक रुपमा मत्स्यपालन गर्न लागेको वरिष्ठ कृषि विकास अधिकृत राजेन्द्र कोइरालाले बताए ।
अन्य पेसा तथा व्यवसायका तुलनामा मत्स्यपालनबाट यथेष्ट आम्दानी गर्न सफल भएको र उत्पादित वस्तु बिक्री गर्न बजारको समस्या नभएकाले आकर्षण बढेको दोभानका किसान सन्तोष शाक्यले बताए । । दोभान गाविसका १० जना किसानले व्यावसायिक रुपमा माछापालन गरेका छन् ।
यहाँका किसानले सिल्भर, विगहेड, कमन, रहु जातको माछापालन गरेका छन् । सिमसार क्षेत्र पर्ने अन्य बालीको उत्पादन लिन नसकिएको जमिनमा किसानले माछापालन गरी मनग्य आम्दानी गर्न सफल भएका छन् ।
कृषि विकास कार्यालयले मत्स्यपालन व्यवसायका लागि माछा पोखरीमा प्रयोग हुने चुन र माछालाई आवश्यक पर्ने प्रोटिनयुक्त दाना निःशुल्क रुपमा किसानलाई उपलब्ध गराएको छ । पानीमा अक्सिजन दिने मेसिनको खरिदमा ५० प्रतिशत अनुदान उपलब्ध गराएको कृषि प्रसार अधिकृत वैकुण्ठ खनालले बताए ।
विगत दुई वर्षदेखि व्यावसायिक रुपमा मत्स्यपालन गर्नुभएका बौघागुम्बाका किसान टङ्कनाथ घिमिरेले तीन रोपनी क्षेत्रफलमा चारवटा पोखरी निर्माण गरी माछापालन गर्दा गत वर्ष साढे सात क्विन्टल माछा बिक्रीबाट रु दुई लाख आम्दानी गर्न सफल भएका छन् ।मत्स्यपालनका लागि किसानमा यससम्बन्धी ज्ञान नभएका कारण अन्य पेसा तथा व्यवसाय जस्तो फस्टाउन नसकेको उनीहरुको भनाइ छ । रासस