काठमाडौँ । जनता समाजवादी पार्टीका अध्यक्ष अशोककुमार राईले संविधानलाई अझै समृद्ध बनाउन जरुरी रहेको बताउनुभएको छ ।
आईतवार काठमाडौंमा नेकपा (एकीकृत समाजवादी) को राष्ट्रिय महाधिवेशनलाई सम्बोधन गर्दै उहाँले यस्तो बताउनुभएको हो । उहाँले संविधानलाई अझै खारेर पहिचानयुक्त, सुदृढ र सफल बनाउन आवश्यक रहेको बताउनु भयो । उहाँले धेरै मेहनत, त्याग, तपस्याबाट र हजारौँ हजार शहीदहरुको बलिदानबाट यो व्यवस्था आएको भन्दै यसलाई व्यवस्थित बनाउन आवश्यक रहेको बताउनु भयो । उहाँले लोकतन्त्रलाई अझै सफल बनाएर समाजवादतर्फ लम्किनुपर्ने बताउनु भयो ।
उहाँले भन्नुभयो, ‘हामीले धेरै मेहनत गरेर यो परिवर्तन ल्याएका छौँ । म पनि नेपाली राजनीतिको संघर्षशिल क्षणको एउटा बिन्दुबाट यहाँ बस्नुभएका वरिष्ठ नेताहरुको पछिपछि आन्दोलनमा सरिक भएको मान्छे हुँ । धेरै मेहनत, त्याग, तपस्याबाट र हजारौँ हजार शहीदहरुको बलिदानबाट यो परिवर्तन आएको छ, संघीय लोकतान्त्रिक गणतन्त्र । संविधानलाई अझै हामीले समृद्ध बनाउनु छ । खार्नु छ । पहिचानयुक्त बनाउनु छ । संघीयतालाई अझै सुदृढ गर्नुछ । लोकतन्त्रलाई अझै सफल बनाएर समाजवादतर्फ हामी लम्किनु छ ।’
अध्यक्ष राईले शहीदहरुको बलिदानबाट प्राप्त व्यवस्थालाई कुनै चोट लाग्न दिन नहुने बताउनु भयो ।
