काठमाडौं । आईसीसी महिला टी–ट्वान्टी विश्वकप एसिया छनोटमा नेपाली महिला क्रिकेट टोलीले पहिलो जित हात पारेको छ ।
दुबईको आईसीसी क्रिकेट एकेडेमीमा मंगलबार भएको खेलमा नेपालले भुटानलाई ८ विकेटले पराजित गरेको हो ।
भुटानले दिएको ६२ रनको लक्ष्य नेपालले ८ ओभर ३ बलमा मात्र २ विकेट गुमाएर पूरा गर्यो ।
नेपालको जितमा इन्दु बर्माले अविजित १८ रन जोडिन् भने सिता राना मगरले १७ तथा कप्तान रुबिना क्षेत्रीले १० रन जोड्दा कविता जोशी ८ रनमा अविजित रहिन् ।
भुटानकी टासी छेकीले एक विकेट लिईन् ।
यस अघि पहिले ब्याटिङ गरेको भुटानले २० ओभरमा ६ विकेट गुमाएर ६१ रन बनाएको थियो ।
भुटानका लागि नगावाङ छोदेनले १३, सोनाम पाल्डोनले ११ तथा कप्तान एसेय छोदेनले ९ रन जोडिन् ।
नेपालका लागि सिता राना मगरले चार ओभर बलिङ गर्दै १० रन खर्चेर सर्वाधिक ३ विकेट लिइन् । यस्तै करुणा भण्डारीले एक विकेट लिइन् ।
यस जितसँगै नेपालले २ खेलमा २ अंक जोडेको छ ।
