काठमाडौं, असोज १० गते । नेपालका लागि जापानी राजदूत मासामिची साइगोले त्रिभूवन विश्वविद्यालय शिक्षण अस्पतालका लागि जापान सरकारकाबाट तर्फबाट उपलब्ध गराइएका चिकित्सा उपकरण एक समारोहबीच शिक्षामन्त्री गिरिराजमणी पोखरेललाई हस्तान्तरण गर्नुभयो ।
जापानले उपलब्ध गराएका सामग्रीको मूल्य करिब ६९ करोड ३० लाख रहेको नेपालस्थित जापानी राजदूतावासका सांस्कृतिक विभागका इश्वरी प्रसाद भट्टले जानकारी दिनुभयो ।
शिक्षण अस्पतालको क्षमता निर्माणमा जापान सरकारले सन् १९९२ देखि नै विभिन्न सहयोग गरिआएको छ । राजधानीको अति व्यस्त यस अस्पतालमा बिरामीको आवश्यकतालाई मध्यनजर गरी जापानको सहयोग निरन्तर जारी रहेको पनि दूतावासले जनाएको छ ।
पछिल्लो सहयोगबाट म्याग्नेटिक रिसोनेन्स इमेजिङ (एमआरई), एक्सरे इमेजिङ उपकरण, इन्डोस्कोपी र स्टेरिलाइजर समेतका अत्याधुनिक उपकरण खरिद गर्नुका साथै अस्पतालको भवनको छाना र भुइँतलालाई जिर्णोद्धार गरिनेछ ।
सो अवसरमा राजदूत साइगोले उक्त सहयोगबाट सहज मूल्यमा बिरामीले गुणस्तरीय स्वास्थ्य सुविधा प्राप्त गर्ने विश्वास व्यक्त गर्नुभयो । उहाँले जापान र नेपालबीचको मैत्रीपूर्ण सम्बन्धमा यो सहयोगले पनि महत्वपूर्ण भूमिका खेल्ने बताउनुभयो ।