संसदको राज्य व्यवस्था समितिमा भएको छलफलका क्रममा समाचार संकलनमा पुनः रोक लागेको छ । रक्षा मन्त्रालय र नेपाली सेनाका आर्थिक एवं प्रशासनिक गतिविधि बुझ्न कार्यवाहक प्रधानमन्त्री एवं रक्षामन्त्री इश्वर पोखरेल, रक्षासचिव बिष्णु लम्साल, प्रधान सेनापति पूर्णचन्द्र थापालगायत उच्च अधिकारीलाई आज समितिले बैठकमा बोलाएको थियो ।
तर रिपोर्टिङमा पुगेका पत्रकारलाई भने रोक लगाइएको छ । त्यहाँ पुगेका पत्रकारलाइ बैठक कक्षमा प्रवेश गर्न दिएन । सो समितिका सभापति शशी श्रेष्ठले संवेदनशील विषयमा छलफल हुने भएकाले पत्रकारलाइ बाहिरै बस्न आदेश दिएकी थिइन् । श्रेष्ठ सभापति भए यता समिति बैठकमा संचारकर्मीलाई रोक लगाएको यो तेस्रो पटक हो । त्यसैले सभापति श्रेष्ठ निरंकुश बन्दै गएको आरोप पत्रकारहरुले लगाएका छन् ।
यसअघि सोमबार गृह मन्त्रालयसम्बन्धी छलफलमा समेत पत्रकारलाई प्रवेश दिइएको थिएन । संसदका सबै समितिमा पत्रकारलाइ पदेन सदस्य सरह निर्वाध प्रवेश दिने प्रचलन छ । सार्वजनीक लेखा र राज्य व्यवस्था समितिको विगत त झन यस मामिलामा सबै भन्दा उदार मानिन्थ्यो ।
