काठमाडाैंः अख्तियार दुरूपयाेग अनुसन्धान अायाेगले पप्पु कन्स्ट्रक्सन विरूद्ध बर्दियामा गुणस्तरहीन पुल बनाएकाे भन्दै विशेष अदालत काठमाडौंमा आरोप-पत्र दायर गरेकाे छ ।
अख्तियारकाे विज्ञप्तिमा भनिएकाे छ, बर्दिया सदरमुकाम गुलरिया र बारबर्दिया नगरपालिका जोड्ने जब्दीघाटको बबई पुल निर्माणमा गुणस्तरहीन सामाग्री प्रयोग भएको, पुल बनाउँदाखेरि नै बाङ्गो देखिएको र पुल उद्घाटन नहुँदै भत्किएको बन्ने समेतको व्यहोराको उजुरी निवेदनका सम्बन्धमा आयोगबाट अनुसन्धान हुँदा डिभिजन सडक कार्यालय नेपालगञ्ज र पप्पु कन्स्ट्रक्सनबीच पुल निर्माणका लागि २०६८ असार २२ गते सम्झौता भएकाे थियाे ।
बर्दिया सदरमुकाम गुलरिया र बारबर्दिया नगरपालिका जोड्ने जब्दीघाटको बबई पुल निर्माणको प्रारम्भिक चरणदेखि अन्तिम चरणसम्मको अवस्थालाई हेर्दा निर्माण अवधिमा संलग्न सबै प्राविधिक कर्मचारीहरुबाट लाईन लेभल तथा पायर हाइटको सम्बन्धमा भएको गम्भीर लापरवाहीलाई नसच्याई त्रुटीपूर्ण कार्यलाई स्वीकार गरी गुपचुप रुपमा कार्य गरेको,फिल्डको नाँपजाँच हचुवाको भरमा गरेको, स्पेसिफिकेसनकाे बुँदा ११२ बमोजिम नभएको, स्पेसिफिकेसनकाे बुँदा १०४ बमोजिम निर्माण व्यवसायीबाट गुणस्तर याेजना पेश गर्न लगाई स्वीकृत गरी निर्माण सामाग्रीहरुको गुणस्तर नियन्त्रण प्रभावकारी नभएको तथा गुणस्तर प्रमाणित नभइकन नै भुक्तानी सिफारिस गरेको, पाइलहरूकाे गहिराइ डिजाइन बमोजिम नभएको वा डिजाइन बमोजिम निर्माण नगरेको तथा निर्माण भएको पाइलहरुमा समेत क्याभिटीज भएको कारणले नै पाइलले भार लिन नसकी पुल भास्सिएको तथ्य प्रविधिक परीक्षण तथा विश्लेषणबाट समेत पुष्टी भएकाे अायाेगकाे दाबी छ ।
निर्माण अवधिमा संलग्न सबै प्राविधिक कर्मचारीहरुबाट लाईन लेभल तथा पायर उचाइको सम्बन्धमा भएको गम्भीर लापरवाहीलाई स्वीकार गरी गुपचुप रुपमा कार्य गरेको देखिँदा उक्त कार्यमा निर्माण व्यवसायी तथा निर्माण अवधिमा संलग्न सम्पूर्ण प्राविधिक कर्मचारीहरुको मिलेमतो भएको पुष्टी हुन आएको हुँदा उक्त कार्यमा संलग्न १२ जना ब्यक्ति विरूद्ध विशेष अदालत काठमाडौंमा आरोप-पत्र दायर गरिएको अायाेगले जनाएकाे छ ।
