महोत्तरी, ४ मंसिर । नेपाली कांग्रेसका सहमहामन्त्री डा. प्रकाशशरण महतले वर्तमान कम्युनिस्ट सरकार हरेक क्षेत्रमा असफल साबित भइसकेको बताउनुभएको छ ।
डा. महतले महोत्तरी जिल्लाको भगाहा नगरपालिकामा नेपाली काँग्रेसको पार्टी कार्यालय भवनको उद्घाटन गर्दै भन्नुभयो– मुलुकको कम्युनिष्ट नेतृत्वको वर्तमान सरकार असफल सावित भयो र यो सरकारबाट नेपाली जनता सुखी र समृद्ध हुन नसक्ने धारणा पनि राख्नुभयो ।
उक्त पार्टी कार्यालयको उद्घाटनपछि आयोजित आमसभालाई सम्बोधन गर्दै सहमहामन्त्री डा.महतले नेपालको हरेक लोकतान्त्रिक आन्दोलनको नेतृत्व नेपाली कांग्रेसले गरेको र देशमा शान्ति स्थापनाको काम पनि नेपाली कांग्रेसको नेतृत्वमा नै सम्भव भएको बताउनुभयो ।
वर्तमान संविधानको निर्माण तथा शान्ति स्थापनाको काममा नेतृत्व गरेको नेपाली कांग्रेसबाट नै देशमा आर्थिक र सामाजिक रुपान्तरण सम्भव हुनसक्ने बताउनु भयो ।
काँग्रेस नेता डा.महतले मधेस केन्द्रित दलहरूले पनि मधेसका जनतालाई सत्तामा जाने भ¥याङमात्र बनाएको र चरम अवसरवादी चरित्र देखाएको बताउनुभयो ।
उहाँले मधेश केन्द्रित यी दलहरूबाट तराइ मधेसका जनताको भलो नहुने र नेपाली कांग्रेसले नै तराई मधेसका जनताको अधिकार सुनिश्चित गर्न सक्ने धारणा राख्नुभयो ।
उहाँले जनतको समृद्धि र बिकासको चाहना नेपाली काँग्रेसले मात्र पूरा गर्नसक्ने बताउनु भयो । सहमहामन्त्री डा.महतले नेपाली कांग्रेसका कार्यकर्ताहरुलाई एक भएर जनताको सुख दुःखमा साथ दिन, उनीहरुका समस्या समधानका काममा सामेल हुन र अर्को निर्वाचनमा पार्टीलाई पूर्ण बहुमतका साथ बिजयी गराउने अभियानमा लाग्न पनि आग्रह गर्नुभयो ।
