रुपन्देही । अख्तियार दुरुपयोग अनुसन्धान आयोगले जोगडा माध्यमिक विद्यालयका पूर्व प्रधानाध्यापक जैस मुहम्मदले किर्ते गरी भ्रष्टाचारजन्य कार्य गरेको भन्दै विशेष अदालतमा मुद्दा दायर गरेको छ ।
आयोगका प्रवक्ता रामेश्वर दंगालले जैस मुहम्मद बिरुद्ध कार्बाहीको मागदाबी सहित विशेष अदालत काठमाडौंमा आरोप पत्र दायर गरेको जानकारी दिनुभयो । विद्यालयका लागि विज्ञान सामग्री खरिद नगरी नक्कली बिल भरपाई पेस गरी भ्रष्टाचार गरेको उनीमाथि आरोप छ ।
गैरकानूनी तरिकाले सरकारी कागजको व्यहोरा सच्याई रू दुई लाख सैतीस हजार नौ सय सत्र भुक्तानी लिएको सप्रमाण पुष्टि हुन आएको आयोगको अनुसन्धानबाट देखिएको छ ।
आयोगले भ्रष्टाचार निवारण ऐन, २०५९ को दफा ११ बमोजिमको कसुर देखिएकोले निजलाई सोही ऐनको दफा ११ बमोजिम सजाय गर्न मागदाबी गरेको छ ।
