काठमाडौँ । भोटेकोशी नदीमा आज बिहान आएको बाढीबाट प्रभावितहरुको उद्धार, खोज तथा राहत कार्यलाई तीव्र बनाइएको छ । नेपाली सेनाले हेलिकप्टरमार्फत हालसम्म १२ जनाको उद्धार गरेको जनाएको छ ।
सेनाका अनुसार स्याफ्रुबेँसीबाट ६ जना, मैलुङबाट २ जना र धुन्चेबाट ४ जनाको उद्धार गरिएको हो । प्रभावितहरुको उद्धारका लागि नेपाली सेना र निजी क्षेत्रका हेलिकप्टरसमेत परिचालन गरिएको छ ।
बाढीबाट घाइते भएकाहरुको उपचारका लागि काठमाडौँका विभिन्न अस्पताल, रक्तसञ्चार केन्द्र, बागमती तथा गण्डकी प्रदेशका स्वास्थ्य मन्त्रालय, नेपाल रेडक्रस, स्काउट, लायन्सलगायतका संघसंस्थासँग समन्वय भइरहेको छ । वीर अस्पताल र ट्रमा सेन्टरमा घाइतेका लागि १०० शय्या छुट्याइएको छ ।
प्रभावित क्षेत्रमा उपचारका लागि ट्रमा सेन्टरबाट ६ जना चिकित्सक र २ जना नर्स प्रस्थान गरिसकेका छन् । नेपाल स्काउटबाट पाँच जना चिकित्सक र नौ जना उद्धारकर्मी प्रभावित क्षेत्रमा जाने तयारीमा छन् । स्वास्थ्य सेवा विभागले आवश्यक औषधिसमेत प्रभावित क्षेत्रमा पठाउने तयारी गरेको छ ।
विश्व स्वास्थ्य सङ्गठन (डब्ल्युएचओ)ले प्रभावित क्षेत्रमा एक हजार जनालाई पुग्ने आधारभूत औषधि तथा १५ वटा टेन्ट पठाउने तयारी गरेको छ ।
यसैगरी, प्रभावितलाई लक्षित गरी काठमाडौँ, नुवाकोट र धादिङका खाद्यान्न व्यवस्थापन केन्द्रलाई तयारी अवस्थामा राखिएको छ । नेपाल टेलिकम र एनसेलले प्रभावितका लागि निःशुल्क डाटा, भ्वाइस र एसएमएस सेवा उपलब्ध गराएका छन् ।
आपतकालीन स्वास्थ्यसम्बन्धी सहयोग, जानकारी तथा समन्वयका लागि १११५ मा सम्पर्क गर्न सकिने जनाइएको छ ।
