काठमाडौँ । नेकपा एमालेका अध्यक्ष केपी शर्मा ओलीले पार्टीको महाधिवेशनपछि चुनावको तयारीमा लाग्ने बताउनुभएको छ । पार्टीको १० औँ महाधिवेशको उद्घाटन सत्रलाई सम्बोधन गर्दै उहाँले मुलुकको सार्वभौमसत्ताको रक्षा र विकासका लागि एमालेलाई एकल बहुमत चाहिएकाले महाधिवेशन लगत्तै चुनावको तयारीमा होमिने बताउनुभयो ।
निकट भविष्यमा हुने चुनावहरु आउँदैछन् भन्दै ओलीले भन्नुभयो, “अब हामी चुनावको तयारीमा जानेछौँ, जनमत तयार गर्नेछौँ र एकल बहुमत ल्याएर देशको सार्वभौमसत्ता र लोकतन्त्रको रक्षा गर्नेछौँ ।”
लिम्पियाधुरा, लिपुलेक र कालापानी फिर्ता ल्याउनेछौँ
ओलीले भारतसँग संवाद गरेर नयाँ नक्सामा समेटिएको लिम्पियाधुरा, लिपुलेक र कालापानीको जमीन फिर्ता ल्याउनुपर्ने बताउनुभयो ।
“हामीले नेपालको नयाँ नक्सामा हाम्रो भूगोल लिम्पियाधुरा, लिपुलेक र कालापानीलाई समेटेका छौँ”, उहाँले भन्नुभयो, “अब हामीले हाम्रो छिमेकीसँग संवाद गरेर त्यो जमीन फिर्ता लिनेछौँ, ती जमीन फिर्ता नलिएसम्म हामीलाई दबिएको र हेपिएको अनुभति भइरहन्छ, हामीले त्यो जमीन फिर्ता ल्याएर वास्तविक मित्रता र छिमेकीको सम्बन्ध बनाउन चाहन्छौँ ।”
