काठमाडौं । गैरआवासीय नेपाली संघ (एनआरएन) नेपाली नागरिक सरह नागरिकता दिलाउन आग्रह गरेका छन् । विद्यमान कानुनले गैर आवासीय नेपाली नागरिकहरुको अधिकार कटौती गरेकोले सुधार गरेर अगाडि बढ्न पहल गरेका छन् ।
एनआरएनका संस्थापक अध्यक्ष उपेन्द्र महतोले गैरआवासीय नेपालीलाई पनि नेपाली नागरिक सरह नागरिकता पाउने कानुनी व्यवस्था गर्न संघीय संसद र सरकार दुवैलाई आग्रह गरेका हुन् ।
बिहीबार संघीय संसदको राज्य व्यवस्था तथा सुशासन समितिको बैठकमा ‘उनले राष्ट्र निर्माण गर्ने अभियानमा आफूहरुलाई पनि सहभागी गराउन अपिल समेत गरेका छन् । उनले नेपाल नागरिकता ऐनलाई संशोधन गर्न बनेको बिधेयको छलफलमा गैर आवासीय नेपाली नागरिकलाई पनि नेपाली नागरिक सरह नागरिकता लिन पाउने व्यवस्था गर्न संघीय संसद र सरकारको ध्यानाकर्षण गराए ।
उनले गैर आवासीय नेपालीहरु राष्ट्र निर्माणको अभियानमा प्रतिवद्ध रहेको हातेमाले गरेर अगाडि बढ्न सुझाव समेत दिएका छन् ।
एनआरएनका अध्यक्ष भवन भट्टले पनि गैर आवासीय नेपालीहरु नेपाललाई समृद्ध बनाउन प्रतिवद्ध रहेकोे उल्लेख गर्दै त्यसमा शंका नगर्न समितिका सदस्यहरुलाई आग्रह गरे । उनले नेपालको समृद्धिको अभियानमा गैर आवासीय नेपालीहरु सहयोगको दायरा बढाउन अझै क्रियाशील भएर लागिपर्ने प्रतिवद्धता पनि व्यक्त गरे ।
बैठकमा प्रमुख प्रतिपक्ष दल नेपाली काँग्रेसका सांसद दिलेन्द्रप्रसाद बडुले गैर आवासीय नेपालीलाई सम्बन्धित देशकै नेपाली दुतावासबाट नागरिकता लिन पाउने व्यवस्था गर्न सरकारसँग माग गरे । उनले गैर आवासीय नेपालीहरुको भावी पुस्ताले पनि नेपाली नागरिकता पाउने व्यवस्था गर्न सरकारले अप्ठयारो मान्न नहुने धारणा पनि राखे ।
विधेयकमा गैर आवासीय नेपालीहरुको आर्थिक, सामाजिक तथा सांस्कृतिक अधिकार हुने गरी नेपाली नागरिकताको प्रमाण पत्र वितरण गर्ने प्रस्ताव गरिएको छ ।
