काठमाडौं । लिग लिडर लिभरपुलले इंग्लिस प्रिमियर लिग फुटबलमा आर्सनललाई भारी अन्तरले पराजित गरेको छ ।
शनिबार राति लिभरपुलको घरेलु मैदानमा भएको खेलमा आर्सनललाई लिभरपुलले ५–१ गोलअन्तरले पराजित गरेको हो । लिभरपुलको जितमा रोबर्टो फिर्मिन्होले ह्याट्रिक गोल गर्नुका साथै मोहमद सलाह र साडियो मानेले समान १-१ गोल गरेका थिए।
खेलको ११ औं मिनेटमा नै निल्सले गोल गर्दै आर्सनललाई सुरुवाती अग्रता दिलाएका थिए । तर आर्सनलले सुरुवाती गोल गरेपनि खेल लिभरपुल माथिको अग्रता कायम गर्न सकेन ।
आर्सनल माथि खेलको १४ औं मिनेटमा फिर्मिन्होले गोल गर्दै लिभरपुललाई १–१ गोलको बराबरी दिलाएका थिए । त्यस्तै खेलको १६औं मिनेटमा फिर्मिन्होले दास्रो गोल गर्दा लिभरपुल खेलमा २–१ गोलको अग्रता बनाएको थिए ।
त्यसपछि मानेले खेलको ३२ औं मिनेटमा गोल गर्दै लिभरपुललाई ३–१ को अग्रता दिलाएका थिए । सलाहले खेलको पहिलो हाफको अन्तिम समय अर्थात ४५ औं मिनेटमा गोल गरेपछि खेल ४–१ को स्थितिमा पुगेको थियो ।
पहिलो हाफमा निकै राम्रो खेल खेलेको लिभरपुलले दोस्रो हाफमा भने थप एक गोल मात्रै गर्न सक्यो । लिभरपुलका लागि खेलको ६५ औं मिनेटमा फिर्मिन्होले पेनाल्टीबाट गोल गर्दै ह्याट्रिक पूरा गरे । उनकै ह्याट्रिक गोलमा लिभरपुलले आर्सनललाई ५–१ गोलअन्तरले पराजित गरेको हो ।
जितपछि लिभरपुलले २० खेलबाट ५४ अंक बनाएको छ । पराजित आर्सनलको भने २० खेलबाट ३८ अंक रहेको छ । दोस्रो स्थानमा रहेको टोटनह्यामको १९ खेलबाट ४५ अंक रहेको छ ।
