पेरिसः यस वर्ष सन् २०२० को पुरुषतर्फको उत्कृष्ट फुटबल खेलाडीको उपाधि पोल्यान्डका अन्तर्राष्ट्रिय फुटबलर रोबर्ट लेबान्डोस्कीले प्राप्त गर्ने सम्भावना बढेर गएको छ । तर उनको अघिल्तिर उही लियोनेल मेस्सी तगारो बनेर उभिइरहेका छन् ।

मेस्सी पनि सातौं पटक “बालोन डिओर” वर्ष खेलाडीको उपाधि हात पार्ने दौडमा छन् । पछिल्लो वर्ष उत्कृष्ट फर्ममा देखिएका लेबान्डोस्कीले २९ खेलबाट ४१ गोल गरेका थिए । लेबान्डोस्कीको पक्षमा बायर्न म्युनिख टिमका साथी थोमस मुलर र मुख्य प्रशिक्षक जुलियान नागेल्समानको पनि समर्थन छ ।

३३ वर्षीय लेबान्डोस्की हाल जर्मन बुन्डेसलिगाको बायर्न म्युनिखबाट खेलिरहेका छन् । उनले सन् २०२० मा पुरुषतर्फ फिफाको उत्कृष्ट खेलाडीको पुरस्कार पाएका थिए ।

लियोनेल मेस्सी र क्रिस्टियानो रोनाल्डो दुबैले १२ पटक बालोन डिओरको उपाधि जितिसकेका छन् । सन् २०१८ मा लुका मोड्रिकले रियल म्याड्रिडलाई च्याम्पियन्स लिगको उपाधि जिताउन तथा आफ्नो देश क्रोएसियालाई विश्वकप फुटबलको फाइनलमा पु¥याउन महत्वपूर्ण योगदान दिएको भन्दै यो पुरस्कार प्राप्त गरेका थिए ।

अर्जेन्टिनी स्टार मेस्सीले बार्सिलोना छाडेर फ्रान्सको पेरिस सेन्ट–जर्मेनमा नयाँ सत्र शुरु गरेपछि पनि टिमका लागि ३० गोल गर्नुका साथै बार्सिलोनालाई कोपा डेल रे को उपाधि जिताउन महत्वपूर्ण योगदान गरेका थिए ।

गत जुलाईमा सम्पन्न कोपा अमेरिकाको उपाधि जिताउन पनि मेस्सीको योगदान उत्कृष्ट रहेको थियो । त्यस खेलमा अर्जेन्टिनाले ब्राजिललाई पराजित गरेर कोपा अमेरिका कपको उपाधि चुमेको थियो । अर्जेन्टिनाले २८ वर्षपछि कोपा अमेरिकाको उपाधि जितेर इतिहास निर्माण गरेको थियो ।

मेस्सीले काटालान स्पोर्ट दैनिकसँग कुरा गर्दै आफूले देशका लागि सर्वोत्कृष्ट योगदान गरेको स्मरण गरेका थिए ।

रोनाल्डोले भने सन् २०१७ मा अन्तिम पटक बालोन डिओरको उपाधि उचालेका थिए । हाल म्यान्चेस्टर युनाइटेडका स्ट्राइकर रोनाल्डोले हालसम्म छ पटक यो उपाधि जितेका छन् ।
रियल म्याड्रिडका करिम बेन्जामाको पक्षमा थिएरी अन्री, जिनेदिन जिदान र टेनिस स्टार राफायल नाडालले समर्थन गरेका छन् ।

इटालीको युरो–२०२० का पाँच खेलाडी पनि शर्टलिस्टमा परेका छन् जसमा चेल्सीका मिडफिल्डर एवं च्याम्पियन्स लिग विजयी जोर्जिन्होको नाम पनि समावेश छ । केलिएन एम्बापे, एर्लिङ हल्यान्डलाई भावी प्रतिस्पर्धीका रुपमा हेरिएको छ । साथै ब्राजिलका नेमार र लिभरपुलका स्ट्राइकर मोहमद सलाह पनि आगामी वर्षका दाबेदार हुन सक्नेछन् ।

बालोन डिओरका उपाधि विजेताहरु
सन् २००८ – क्रिस्टियानो रोनाल्डो
सन् २००९ – लियोनेल मेस्सी
सन् २०१० – लियोनेल मेस्सी
सन् २०११ – लियोनेल मेस्सी
सन् २०१२ – लियोनेल मेस्सी
सन् २०१३ – क्रिस्टियानो रोनाल्डो
सन् २०१४ – क्रिस्टियानो रोनाल्डो
सन् २०१५ – लियोनेल मेस्सी
सन् २०१६ – क्रिस्टियानो रोनाल्डो
सन् २०१७ – क्रिस्टियानो रोनाल्डो
सन् २०१८ – लुका मोड्रिक
सन् २०१९ – लियोनेल मेस्सी

एएफपी