काठमाडौं । सर्वोच्च अदालतले टीकापुर घटनाका मुख्य अभियुक्त रेशम चौधरीलाई रिहा गर्न अस्वीकार गरेको छ ।
आफूलाई पुर्पक्षका लागि थुनामा राख्ने जिल्ला अदालत कैलालीको आदेशलाई सदर गर्ने र उच्च अदालत दिपालयको आदेश खारेजको माग गर्दै चौधरी सर्वोच्च गएका थिए ।
तर, सर्वोच्चका न्यायाधीश ईश्वरप्रसाद खतिवडा र पुरुषोत्तम भण्डारीको संयुक्त इजलासले जिल्ला र उच्च अदालतको आदेशलाई नै अस्वीकार गरेको हो ।
सर्वोच्चले सई मानबहादुर बोहरासहित आठ जनाको जाहेरीमा रेशमकै निर्देशनमा घटना भएको तथ्यलाई आधार मानेको छ। यस्तै अन्य अभियुक्तहरु सुन्दरलाल कडरिया, प्रेमबहादुर चौधरी, राजकुमार कडरिया र रामप्रसाद चौधरी समेतले बयानमा रेशम समेत घटनामा संलग्न रहेको सर्वोच्चको आदेशमा उल्लेख छ।
उनले आफूलाई थुनामा राख्ने जिल्ला अदालतको आदेश कानुनसम्मत नभएको भन्दै उच्च अदालतमा निवेदन दिएका थिए । तर उच्च अदालतले पनि जिल्ला अदालतकै आदेशलाई सदर गरेपछि चौधरी सर्वोच्च आएका हुन् ।
