काठमाडौं । सरकारले मानव स्वास्थ्य र वातावरणमा गम्भिर असर पार्ने रसायन मर्करीको उचित व्यवस्थापन गर्ने भएको छ । सरकारले उक्त रसायन व्यवस्थापनका लागि ‘मिना माता महासन्धि’ अनुमोदन गर्ने भएको हो ।
वन तथा वातावरण मन्त्रालयका सचिव डा.विश्वनाथ ओलीका अनुसार मानव स्वास्थ्य तथा वातावरणमा गम्भीर असर पार्ने रसायन मर्करीको उचित व्यवस्थापनका लागि सरकारले सो सम्बन्धि ‘मिना माता महासन्धि’ छिट्टै अनुमोदन गर्ने प्रतिवद्धता जनाएको छ। उनले सो रसायनको उचित व्यवस्थापनका लागि सरकारले आवश्यक नीति, कानुन र कार्यक्रम तय गरेर रसायनलाई शून्य बनाउने जानकारी दिए।
नेपालले सन् २०१३ मा मर्करी जस्ता विषादि रसायनको उचित व्यवस्था गर्ने प्रतिवद्धता जनाउँदै ‘मिना माता महासन्धि’मा हस्ताक्षर गरेको थियो। तर हालसम्म उक्त रसायनको प्रयोग उच्च रुपमा नेपालमा हुदैँ आईरहेको थियो ।
