भद्रपुर । झापाको भद्रपुर नगरपालिकालाई केन्द्र बनाएर खोज पत्रकारिताको विकासका लागि काम गरिरहेको खोज पत्रकारिता मञ्च चन्द्रगढीले पत्रिका वितरणमा संलग्न वितरकहरूलाई न्यानो कपडा प्रदान गरेको छ ।
आर्थिक अवस्था कमजोर भएर पढाइ खर्च चोहो गर्न बिहान पत्रिका वितरण गरी दिउँसो विद्यालय अध्ययन गर्दै आएका भद्रपुर क्षेत्रका ७ जना किशोरलाई जनही एक थानका दरले जम्पर ज्याकेट प्रदान गरिएको हो ।
सामाजिक उत्तरदायित्व बोध कार्य अन्र्तगत मञ्चले ७ हजार मूल्य बरावरका कपडा हस्तान्तरण गरेको हो । अध्यक्ष ईश्वर अधिकारी, उपाध्यक्ष उत्तम नेपाल, सचिव द्रोण अधिकारी र सदस्य डिल्लीरमण नेपालको आर्थिक सम्योजनमा खरिद गरिएको कपडा हस्तान्तरण कार्यक्रमको प्रमुख अतिथि भद्रपुर नगरपालिकाका ७ नम्बर वडाध्यक्ष विनोदप्रसाद पोखरेल रहेका थिए । कार्यक्रममा वडाध्यक्ष पोखरेलले सञ्चारकर्मीको भूमिका असल समाज निर्माणमा केन्द्रित भए पनि विपन्नता पहिचान र सम्पन्नताका लागि सामाजिक उत्तरदायित्व बोध पनि रहेको धरणा राखेका थिए । उनले समृद्ध समाज निर्माण गर्न पत्रकारिता पहिलो खुड्किलो भएको भन्दै मञ्चको कार्यको प्रशंसाा समेत गरेका थिए ।
पढाइ खर्चका लागि पत्रिका बाँढिरहेका वितरकहरूले पहिलो पटक उपहार स्वरूप न्योनो कपडा पाउँदा हर्सित देखिन्थे । काम गरेको पैसामात्र हात पर्ने गरेकोमा यस पटक जम्पर पाउँदा धेरै खुसी लागेको अदिल मगरको धारणा थियो । यस्तै पंकज यादव भन्छन् अरुले न्यानो कपडा पाएको समचार पत्रिकामा हेर्ने गरेका थियौं तर आज आफैले पाएकोमा रमाइलो लागेको छ ।
यता मञ्चका अध्यक्ष ईश्वर अधिकारी समाजको आँखा खेल्न खोजी पत्रकारिता महत्वपूर्ण भए जस्तै सेवाका भावना विस्तार गर्न सामाजिक उत्तरदायित्व बोध अनिवार्य रहेकोले न्यानो कपडा वितरण गरिएको बताउँछन् । अरुलाई यस्तो गर, उस्तो गर भनेर आदर्श छाट्ने जमाना गएको भन्दै अध्यक्ष अधिकारीले निरन्तर सामाजिक उत्तरदायित्व बोध अभियान सञ्चालन गरिरहेने प्रतिबद्धता व्यक्त गरेका छन् ।
