काठमाडौँ । नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ सँग नेपालस्थित चिनियाँ राजदूत होउ यान्छीले भेटवार्ता गर्नुभएको छ । राजदूत यान्छी प्रचण्डलाई भेट्न बुधबार बिहान खुमलटार पुग्नुभएको थियो ।
उहाँहरुबीच चीनका विदेशमन्त्री वाङ यीको नेपाल भ्रमणका विषय लगायत पछिल्लो राजनीतिक अवस्थाबारे कुराकानी भएको बताइएको छ । अहिले विदेशमन्त्री वाङको नेपाल भ्रमणको तयारी भइरहेको छ । परराष्ट्र मन्त्रालयलका अनुसार भ्रमणको मिति टुङ्गो नलागे पनि भ्रमण चाँडै हुनेछ । सोमबार परराष्ट्रमन्त्री डा नारायण खड्काले पनि नेपालमा चाँडै उच्चस्तरीय भ्रमण हुन लागेको जानकारी दिनुभएको थियो ।
नेपाल सरकारले अमेरिकी सहायता परियोजना एमसीसी संसद्बाट अनुमोदन गरिसकेको छ । तर एमसीसी अनुमोदन हुनुअघि चीनले सार्वजनिकरुपमै एमसीसीका बारेमा टिप्पणी गरेको थियो । चीनले एमसीसीप्रति लक्ष्यित गर्दै नेपालको विकास र जनजीवन सुधारका लागि अन्तर्राष्ट्रिय समुदायको योगदानको स्वागत गर्ने तर त्यस्तो सहयोग राजनीतिक शर्तरहित नेपाली जनताको चाहनाबमोजिम हुनुपर्ने बताएको थियो ।
अमेरिकाले यही फागुन १६ गतेभित्र एमसीसी सम्झौता संसद्बाट पारित नगरे नेपाल अमेरिका सम्बन्धमा पुनरावलोकन गर्ने चेतावनी दिएपति चीनको विदेश मन्त्रालयले ‘जबरजस्ती कूटनीति’ को विरुद्धमा रहेको बताएको थियो । चीनको अमेरिकासँग व्यापार युद्ध जारी छ । यही बेला एमसीसी पारित भएपछि छिमेकी मुलुक नेपालसँग कसरी सम्बन्ध अगाडि बढ्ला भन्ने चासोका बीच चिनियाँ विदेशमन्त्रीको भ्रमण हुन लागेको हो ।
