काठमाडौं । प्रधानमन्त्री केपी शर्मा ओलीले विपक्षी काँग्रेसलाई संकेतगर्दै भनेका छन, सबै आफ्नो मर्यादामा बस्नुपर्छ । स्वीटजरल्याण्डबाट फर्किएका प्रधानमन्त्री ओलीले शनिबार बिहान त्रिभुवन अन्तरराष्ट्रिय विमानस्थलको अति विशिष्ट कक्षमा पत्रकारहरुसँग संक्षिप्त कुरा गर्दै सो कुरा बताएका हुन् । उनले ‘संविधान, कानून र संस्थाहरुभन्दा माथि कोही छैन । सबैले यसलाई मर्यादा गर्न सिक्नुपर्छ ।’
पत्रकारहरुले प्रधानमन्त्री ओलीलाई तपाईले गोविन्द केसीसँग गरेको सम्झौताविपरीत संसदबाट चिकित्सा विधेयक पारित भएको छ, यसमा के भन्नुहुन्छ भन्ने प्रश्न सोधेका थिए । सो प्रश्नको जवाफमाा ओलीले डा. केसीको नाम लिएनन र आवेश र उत्तेजनामा नआई देशको हितमा सोच्नुपर्ने बताए । उनको संकेत डा.केसी र नेपाली काँग्रेसप्रति थियो ।
फेरि पनि डा. केसीको मागका विषयमा गरिएको प्रश्नमा ओलीले यतिमात्र भने ‘कुनै पनि चिजको प्रक्रिया हुन्छ ।’
संसदमा विपक्षी दलको विरोधका वावजुत विधेयक पारित भएको विषयमा प्रधानमन्त्री ओलीले लोकतन्त्रमा यस्तो हुनु स्वाभाविक हो भने । उनले भने यो कुनै उधुमको विषय होइन ।
