काठमाडौँ । रियल मड्रिडलाई पराजित गर्दै बार्सिलोना स्पेनिस कोपा डेल रे फुटबलको फाइनलमा प्रवेश गरेको छ ।
बुधबार राति भएको सेमिफाइनलको दोस्रो लेगमा बार्सिलोनाले रियल मड्रिडलाई ३–० गोलअन्तरले पराजित गरेको हो । बार्सिलोनाले रियलमाथि समग्रमा ४–१ गोलको जित निकाल्ने क्रममा लुइस स्वारेज नायक बने । स्वारेजले दुई गोल गरे भने एक गोल उपाहार स्वरुप पाएको थियो ।
पहिलो हाफमा गोलरहित बराबरी खेलेको बार्सिलोनाले दोस्रो हाफमा उत्कृष्ट प्रदर्शन गर्दै जित हात पारेको हो । ५० औं मिनेटमा स्वारेजले गोल गर्दै बार्सिलोनालाई अग्रता दिलाए ।
६९ औं मिनेटमा राफयल भरानेले आत्मघाती गोल गरेपछि बार्सिलोनाले दोब्बर अग्रता बनाएको थियो । ७३ औं मिनेटमा स्वारेजले पेनाल्टीबाट अर्को गोल गर्दै बार्सिलोनालाई ३–० गोलको जित दिलाएका हुन् ।
