काठमाडौँ । इथियोपियामा र इन्डोनेसियामा बोइङ ७३७ म्याक्स ८ विमानहरु दुर्घटना भएपछि चीनले आफ्ना सबै घरेलु सेवाप्रदायक कम्पनीहरुलाई विमानहरु तत्कालै ग्राउन्ड गर्न निर्देशन दिएको छ ।
यही मोडलको विमान आइतबार इथियोपियामा दुर्घटना भएपछि चीनले यस्तो निर्देशन जारी गरेको हो ।
दुई दुर्घटनामा देखिएको ‘समानता’ लाई औल्याउँदै चीनको नागरिक उड्डयन प्राधिकरणले स्थानीय समयअनुसार सोमबार साँझ ६ बजेभित्र सबै ७३७ म्याक्स ८ विमानलाई ग्राउन्ड गर्न निर्देशन दिएको छ ।
प्राधिकरणले एक विज्ञप्ति जारी गर्दै विमानको सुरक्षालाई सुनिश्चित गरेपछि मात्र उक्त मोडलको विमानलाई उडान भर्न अनुमति दिइने बताएको छ ।
‘दुवै दुर्घटनामा नयाँ बोइङ ७३७–८ विमान परेको छ र दुवै दुर्घटना उडान भर्ने क्रममा भएका छन् । दुवैमा केही समानताहरु छन्,’ सुरक्षाको विषयमा शुन्य सहनशीलता अपनाउने आफ्नो नीति दोहोराउँदै प्राधिकरणले भनेको छ । ७३७ म्याक्स ८ लाई ७३७–८ पनि भनिन्छ ।
उड्डयन प्राधिकरणले यसमा विषयमा अमेरिकी फेडरल एभिएसन एडमिनिस्ट्रेसन र बोइङ कम्पनीसँग छलफल गर्ने बताएको छ ।
केन्यातर्फ उडिरहेको इथियोपियन एयरलाइन्सको विमान आदिस अबाब नजिकै दुर्घटना हुँदा विमानमा सवार सबै १५७ जनाको निधन भएको थियो । यसमा ८ जना चिनियाँ नागरिक पनि थिए ।
यसअघि सन् २०१८ को अक्टोबरमा इन्डोनेसियाको लायन एयरको ७३७ म्याक्स ८ विमान जकार्ताबाट उडान भर्ने बित्तिकै दुर्घटना हुँदा १८९ जनाको मृत्यु भएको थियो ।
चीनमा हाल ७६ वटा बोइङ ७३७ म्याक्स ८ विमान रहेका छन् भने त्यहाँ थप १०४ वटा विमान अर्डर गरिएको छ ।