काठमाडौँ । प्रधानमन्त्री केपी शर्मा ओलीले माथिल्लो त्रिशुली थ्री बी आयोजनाको शेयरका लागि ग्लोबल आइएमई क्यापिटल मार्फत आवेदन दिनुभएको छ ।
‘नेपालको पानी जनताको लगानी, हरेक नेपाली विद्युतको शेयरधनी’ भन्ने नाराका साथ थालिएको जनताको जलविद्युत कार्यक्रमअन्तर्गत बिहीबार बिहान प्रधानमन्त्री ओलीले ३७ मेगावाट क्षमताको माथिल्लो त्रिशुली थ्री बी आयोजनाको शेयर किन्न ग्लोबल आइएमई क्यापिटलमार्फत पहिलो आवेदकको रुपमा आवेदन दिनुभएको हो ।
सो शेयरमा आवेदन दिन प्रधानमन्त्री ओलीले ग्लोबल आइएमई बैंक लिमिटेडमा आवश्यक बैंक खाता खोल्नुभएको उक्त बैंकले जनाएको छ ।
प्रधानमन्त्रीको साथमा उहाँकी धर्मपत्नी राधिका शाक्य, उर्जा जलस्रोत एवम् सिंचाई मन्त्री बर्षमान पुन र पूर्व सभामुख ओनसरी घर्तीले पनि ग्लोबल आइएमई क्यापिटलमार्फत शेयर आवेदन गर्नुभएको थियो ।
