दाङ । मुर्ति चोरी काण्डमा पक्राउ परेका नेपाल बिद्यार्थी संघका सभापति तिलक रावत फेरी पक्राउ परेका छन् । रावत नेविसंघ दाङ साविक क्षेत्र नम्वर ३ का क्षेत्रिय सभापति हुन् ।
नमस्ते यातायात प्रालिका सल्लाहकार राजु खाँनलाई सांघातिक आक्रमण गरेको आरोपमा प्रहरीले सभापति रावतलाई पक्राउ गरेको हो ।
नेविसंघ दाङ साविक क्षेत्र नम्वर ३ का सभापति समेत रहेका रावतले गएराती करिब पौने ९ बजे घोराहीको तुलसीपुर चोकमा खाँनलाई बियरका बोतलले आक्रमण गरेका थिए । आक्रमणबाट घाइते भएका खाँनको उपचार नेपालगन्ज मेडिकल कलेज कोहोलपुरमा गरिएको हो । खाँनले रावतले आफूलाई आक्रमण गर्नुका साथै आफूसँग भएको ४२ हजार २ सय ५० रुपैँया लुटेर लगेको जानकारी दिएका छन् ।
दाङ प्रहरी प्रमुख एसपी बेलबहादुर पाण्डेले उनलाई पक्राउगरी हिरासतमा राखिएको र के मुद्दा चलाउने भन्ने बिषयमा अनुसन्धान भइरहेको जानकारी दिएका छन् । एसपी पाण्डेका अनुसार रावत अपराधिक पृष्ठभुमीका व्यक्ति हुन् ।
यसअघि रावतलाई नेपाल प्रहरीले मुर्ति चोरीको आरोपमा २४ दिन हिरासतमा राखी अदालतले काराकार पठाएको थियो । पछी उनि धरौटीमा छुटेको प्रहरी स्रोतले जानकारी दिएको छ ।
