काठमाडौं । ईन्डियन प्रिमियर लिग (आईपीएल) को ४१ औं खेलमा सनराइजर्स चेन्नई सुपर किंग्सले सनराइजर्स हैदरावादलाई ६ विकेटले पराजित गरेको छ । १ सय ७६ रनको लक्ष्य पाएको चेन्नईले अन्तिम ओभरको एक बल अगाडी ४ विकेटको क्षतिमा लक्ष्य पुरा गरि जित हात पारेको हो । जितसँगै चेन्नई सुपर किंग्स अंक तालिकामा शीर्ष स्थानमा उक्लिएको छ भने प्ले अफ पनि पक्कापक्की भएको छ ।
घरेलु मैदानमा टस जितेर फिल्डिंग रोजेको चेन्नईको जितमा ओपनर शेन वाटशनको उत्कृष्ट प्रर्दशन रह्यो । ५३ बलमा ९ चौका र ६ छक्कासहित ९६ रन प्रहार गरेका वाटसनलाई १८ ओभरको पहिलो बलमा जोनी बेयरस्ट्रोले क्याच आउट गरे । सुरेश रैनाले २४ बलमा ६ चौका र १ छक्का सहित ३८ रन बनाए ।
त्यस्तै फाफ डु प्लेसिस १, आम्वाती रायुडु २१ रनमा आउटहुँदा केदार जाधव ११ रनमा अविजित रहेका थिए । हैदरावादका लागि भुवनेश्वर कुमार,सन्दीप शर्मा र राशिद खानले समान १ विकेट लिए ।
त्यसअघि हैदरावादले २० ओभरमा ३ विकेटको क्षतिमा १ सय ७५ रन बनाएको थियो । जसका लागि मनिष पान्डे ४९ बलमा ७ चौका र ३ छक्कासहित ८३ रनमा अविजित रहे भने डेविड वार्नर ४५ बलमा ३ चौका र २ छक्का सहित ५७ रन बनाएर आउट भए ।
दोस्रो ओभरको तेस्रो बलमा ओपनर जोनी बेयरस्ट्रोलाई धोनीले शुन्य रनमा क्याच आउट गरे । विजय शंकर २६ रनमा आउट भए । चेन्नईका हरभजन सिंहले २ र दिपक चाहरले १ विकेट लिए ।
योसँगै ११ खेल खेलेको चेन्नई ८ जितका साथ १६ अंकसहित शीर्ष स्थानमा पुगेको छ । बराबर खेलेको दिल्ली क्यापिटल्स ७ जितसहित १४ अंककासाथ दोस्रो स्थानमा छ ।
