काठमाडौं । स्पेनिस ला लिगामा रियाल म्याड्रिडको खराब प्रदर्शन रोकिएको छैन । ला लिगाअन्तर्गत आइतबार राति भएको खेलमा रियल म्याड्रिड रेलिगेसनमा रहेको कमजोर टोली रायो भालेकानोसँग १-० गोलले पराजित भएको छ ।
घरेलु मैदानमा भालेकानोले २३ औं मिनेटमा गोल गरेको थियो । एड्री इमबार्बाले पेनाल्टीमा गोल गरेका थिए । रियलका जेसस भालेजोले भालेकानोका जाभी गुरेरालाई फल गरेपछि प्राप्त पेनाल्टीलाई एड्रीले सही सदुपयोग गरे । रियलले लगातार गोल गर्ने मौका पाएपनि सदुपयोग गर्न सकेन । यस सिजनको लिगमा रियलको यो १० औं हार हो ।
लिगमा ३५ खेल सकेको रियल ६५ अंकसहित तेस्रो स्थानमा यथावत छ । ३१ अंक बनाएको भालेकानो १९ औं स्थानमा छ । शीर्ष स्थानमा हरेको बार्सिलोनाको ८३ अंक छ । बार्सिलानाले तीन खेल अगावै लिग जितिसकेको छ । दोस्रो स्थानमा आसिन एट्लेटिको म्याड्रिडको ७५ अंक छ ।
आइतबार राति नै भएको अन्य खेलमा इबरले भ्यालेन्सियालाई १-०, गिरोनाले सेभियालाई १-०, रियल सोसिडाडले गेटाफेलाई २-१ गोलले हराएको छ । अर्को खेलमा भिल्लारियल र एसडी हुयस्काले १-१ गोलको बराबरी खेल्दै अंक बाँडेका छन्
