काठमाडौं। युइएफए युरोपा लिग फुटबलको सेमिफाइनल अन्तर्गतको पहिलो लेगमा बराबरीमा अवस्था बनाउँदै चेल्सी जर्मन क्लब इन्ट्राचट फ्रान्कफुर्टसँग हारबाट जोगिएको छ ।
फ्रान्कफर्टको घरेलु मैदानमा भएको प्रतिस्पर्धात्मक खेलमा दुवै गोल पहिलो हाफमा भएका थिए । इन्ट्राचटले खेलको २३ औं मिनेटमा लुका जोभिकको गोलबाट अग्रता बनाएको थियो ।
पहिलो हाफको थप ४५ औँ मिनेटमा पेड्रो रोड्रिग्वेजले गोल फर्काएपछि चेल्सी हारबाट जोगिएको हो । पेड्रोले गोल गर्दै खेललाई १–१ गोलको बराबरीमा राख्दै चेल्सीलाई हारबाट जोगाएको हो ।
खेलमा देवै टोलीले निकै नै लोभ लाग्दा मौकाहरु गुमाउँदा बराबरीमा खेल रोकिएको हो । बराबरीपछि अवे गोलका कारण चेल्सीले फाइनल पुग्ने सम्भावना बलियो देखिएको छ ।
दोस्रो लेग १० मेमा चेल्सीको घरेलु मैदानमा हुनेछ । खेलमा गोलरहित बराबरी वा जित निकालेको अवस्थामा चेल्सीले फाइनलमा स्थान बनाउनेछ । फ्रान्कफर्टलाई फाइनलका लागि जित या दुई वा सोभन्दा बढी गोलको बराबरी आवश्यकता छ ।
