काठमाडौँ । लिभरपुल च्याम्पियन्स लिगको फाइनलमा बार्सिलोनाविरुद्ध अपत्यारिलो ४-० को जित निकाल्दै समग्रमा ४-३ ले विजयी हुदै प्रतियोगिताको फाइनलमा पुगेको हो ।
बार्सिलोनाविरुद्ध महत्वपूर्ण जित निकाल्ने क्रममा डिभोक ओरिगी र जिओर्जीनिओ विजनालडमले २-२ गोल गरेका थिए ।
आफ्ना प्रमुख दुई खेलाडी मोहमद सलाह र रोबर्टो फिर्मिनो बिना खेलेको लिभरपुलले आफ्नो घरेलु मैदानमा उत्कृष्ट फुटबल खेल्दै प्रतियोगितामा कमव्यक गरेको हो । पहिलो हाफको सुरुवाती सात मिनेटमा नै ओरिगीले पहिलो गोल गर्दै लिभरपुललाई सुरुवाती अग्रता दिलाएका थिए ।
पहिलो हाफमा १-० को अग्रता लिएको लिभरपुलले दोस्रो हाफमा तीन गोल थपेको थियो । दोस्रो हाफमा सब्सटिच्युटको रुपमा मैदानमा आएका विजनालडमले खेलको ५४ र ५६ मिनेटमा गोल गरेपछि लिभरपुल ३-० ले अगाडी भएको थियो । त्यसपछि ओरिगीले खेलको ७९औ मिनेटमा गोल गर्दै बार्सिलोनालाई स्तब्ध पारेका थिए ।
योसँगै लिभरपुल लगातार दोस्रो पटक च्याम्पियन्स लिगको फाइनलमा पुगेको छ । लिभरपुल योसँगै युरोपियन प्रतियोगिताको नवौ पटक फाइनलमा पुगेको हो । लिभरपुल लगातार च्याम्पियन्स लिगको फाइनलमा पुग्ने दोस्रो प्रिमियर लिग क्लब समेत बनेको छ । यसअघि म्यानचेस्टर युनाइटेड सन् २००८ र २००९ मा लगातार फाइनलमा पुगेको थियो ।
लिभरपुलसँगको पीडादायी हारपछि बार्सिलोना पछिल्लो ४ च्याम्पियन्स लिगमा तीन पटक सेमिफाइनलबाट बाहिरिएको छ ।
अब लिभरपुलले टोटनह्याम र अयाक्सबीचको खेलका विजेतासँग यस बर्षको च्याम्पियन्स लिग फाइनल खेल्ने छ ।
