काठमाडौं । राष्ट्रिय प्रजातन्त्र पार्टी (राप्रपा)ले देशैभरका मठमन्दिरमा हिन्दू राष्ट्र पुनस्र्थापनाका पक्षमा लेखिएका ब्यानर राख्ने भएको छ ।
हिन्दू राष्ट्र पुनस्र्थापना र राजासहितको लोकतन्त्रका मागलाई मुख्य एजेन्डा बनाएर कमल थापा नेतृत्वको राप्रपाले संविधानमा समेत फरक मत राख्दै आइरहेको छ ।
राप्रपाको जनसंघर्ष परिचालन समितिका संयोजक बुद्धिमान तामाङको अध्यक्षतामा मंगलबार सम्पन्न बैठकले देशका ७७ वटै जिल्लाका मठमन्दिरहरूमा हिन्दू राष्ट्रको माग राखी ब्यानर राख्ने निर्णय गरेको हो ।
बैठकले आन्दोलनसँगै पार्टीको सक्रिय सदस्यता वितरण अभियान तीव्र बनाउने, काठमाडौं उपत्यकाभित्रका १५ वटै निर्वाचन क्षेत्रमा १५ दिन भित्रमा क्षेत्रीय भेला सम्पन्न गर्नेसमेत निर्णय गरेको छ ।
यसैगरी, बैठकले मेची–महाकाली राष्ट्रिय स्वाभिमान यात्राको क्रममा छुटेका पहाडी जिल्लाहरूलाई समेटेर १५ जेठदेखि फेरि यात्रालाई निरन्तरता दिने निर्णय गरेको छ ।
राप्रपाले केन्द्र सरकारका प्रधानमन्त्री केपी शर्मा ओलीसहित सातै प्रदेशका मुख्य मन्त्रीहरूलाई समेत ज्ञापनपत्र बुझाइसकेको छ भने विभिन्न घोषित आन्दोलनका कार्यक्रमसमेत सम्पन्न गरिसकेको छ ।
सरकारले सकरात्मक रूपमा आफ्ना मागहरूलाई सम्बोधन नगरे पुनः संघर्षका कार्यक्रम ल्याउने बताएको छ । यसबीचमा सरकारले कानुन मन्त्रीमार्फत् राप्रपासँग पहिलो चरणको वार्तासमेत गरिसकेको राजधानी दैनिकमा खबर प्रकाशित छ ।
