सुनवल । अस्पताल स्थापनाको विषयलाई लिएर पश्चिम नवलपरासीको सुनवल नगरपालिका वडा नं ७ र ८ का जनप्रतिनिधिसहित स्थानीयवासी आन्दोलित भएका छन् । सुनवल–८ मा रहेको सुनवल स्वास्थ्यचौकीको स्तरोन्नतिका लागि स्वास्थ्य मन्त्रालयबाट रकम विनियोजित भए पनि सो रकमबाट अन्य स्थानमा स्वास्थ्य संस्था स्थापना गर्ने प्रक्रिया अघि बढाइएको विरोधमा आन्दोलनमा उत्रिन बाध्य भएको वडा नं ८ का वडाध्यक्ष एवं सुनवल स्वास्थ्यचौकी व्यवस्थापन समितिका अध्यक्ष नीलकण्ठ गैरेले बताउनुभयो ।
स्तरोन्नति गर्न आएको बजेटलाई केही जनप्रतिनिधिले अन्य स्थानमा लैजाने प्रक्रिया अघि बढाइपछि आन्दोलनमा उत्रिन बाध्य भएको वडा नं ७ वडा सदस्य विनोद पाण्डेले बताउनुभयो । नगरपालिका सो रकमबाट वडा नं ३ र ५ को बीचमा पर्ने मिनी वनकट्टीमा अस्पताल स्थापना गर्ने पक्षमा देखिएको छ । सुनवल स्वास्थ्यचौकीको स्तरोन्नतिका लागि आउने बजेटलाई सोही स्थानमा खर्च गर्नुपर्ने वडा नं ७ का वडाध्यक्ष वसन्त दाहालले बताउनुभयो ।
सुनवल नगरपालिकाले सबैलाई पायक पर्ने स्थानमा स्वास्थ्य संस्था स्थापना गर्न लागेको नगरप्रमुख भीमबहादुर थापाले जानकारी दिनुभयो । सुनवल स्वास्थ्यचौकीको स्तरोन्नति गरी १५ श्ययाको प्राथमिक अस्पताल बनाउनका लागि स्वास्थ्य मन्त्रालयले बजेट विनियोजन गरेको हो ।
