काठमाडौं । अख्तियार दुरुपयोग अनुसन्धान आयोगले सामान्य खाजा पसल चलाउने व्यवसायीसँग मासिक रूपमा हप्ता असुल्ने एक सशस्त्र प्रहरी जवानलाई घुससहित पक्राउ गरेको छ ।
पक्राउ पर्नेमा सशस्त्र प्रहरी बल नेपाल नं ४१ गुल्म हेक्वा–औधोगिक सुरक्षा, बुटवल, रूपन्देहीमा कार्यरत सशस्त्र प्रहरी जवान भेषेन्द्र केसी रहेका छन् ।
प्रहरी केसीलाई बुटवल उपमहानगरपालिका–७ दिपनगर स्थित बुटवल टपटेन मम एण्ड खाजाघरबाट नियन्त्रणमा लिइएको अख्तियार प्रवक्ता प्रदीपकुमार कोइरालाले जानकारी दिए ।
आयोगका अनुसार केसीले खाजा पसल चलाउने व्यवसायीसँग मासिक रूपमा नगद नबुझाए सामान जफत गरी थुनिदिने भनी घुस लिदै गरेको बताएको छ ।
उनले सेवाग्राहीबाट १० हजार घुस लिएका थिए । घुस लिने प्रहरी जवान केसीलाई नियन्त्रणमा लिई अनुसन्धान कार्य भइरहेको अख्तियार प्रवक्ता कोइरालाले बताए ।
