काठमाडौँ । विकसित राष्ट्रहरुको अन्तर्राष्ट्रिय मञ्च जि–२० लाई विश्वव्यापी रुपमा देखिएका दिगो विकासका चुनौतीहरुहरुका सन्दर्भमा आवश्यक सुझाव दिन बनेको बौद्धिक समूहरु टी–२० को शिखर बैठकमा सहभागी हुन नेपाली काग्रेसका सहमहामन्त्री डा.प्रकाशशरण महत गए राति जापान जानुभएको छ ।
जापानको राजधानी टोकियोमा आजदेखि चार दिनसम्म (मे २४ देखि २७) सञ्चालन हुने सो शिखर बैठकमा पूर्व परराष्ट्र मन्त्री समेत रहेका डा.महतले जि–२० लाई आवश्यक सुझाव दिनका लागि बनेको उक्त बौद्धिक समूह बैठकलाई नेपालको तर्फबाट सम्बोधन गर्नुहुने छ ।
जि२० समूहले दिगो विकासका लागि विश्वव्यापी रुपमा देखिएका चुनौतीहरुको समाधानका लागि आवश्यक सुझावहरु संकलन गर्न सो बौद्धिक समूहको गठन गरेको हो ।
सहमहामन्त्री डा.महतले ती चुनौतीहरुको समाधानका पक्षमा विश्वव्यापी सुशासन (ग्लोबल गभर्नेन्स) लगायतका विषयमा नेपालजस्तो अति कम विकसित राष्टहरुका तर्फबाट धारणा राख्नुहुने छ ।
सो बैठकमा जि२० समूहका सदस्य राष्ट्रका तर्फबाट विशेषज्ञहरुको सहभागिता हुने छ । ती देशका राष्ट्रिय नेताहरु तथा बौद्धिक समूहमा रहेका व्यक्तिहरुको उक्त शिखर बैठकमा सहभागिता रहने छ ।
पूर्व परराष्ट्रमन्त्री डा.महतले अतिकम विकसित देशहरुका तर्फबाट विशेष सम्बोधन गर्नुहुने उहाँको सचिवालयले जानकारी दिएको छ ।
