काठमाडौँ, १४ जेठ (रासस) जापानी सम्राट नारुहितोको गद्दी आरोहणको शुभ अवसरमा नेपालका लागि जापानी राजदूत मासामिची साइगोले आज काठमाडौँमा स्वागत समारोहको आयोजना गर्नुभयो ।
सो समारोहमा परराष्ट्रमन्त्री प्रदिपकुमार ज्ञवाली उपस्थिति हुनुभयो । साथै समारोहमा पूर्व प्रधानमन्त्री, मन्त्रीगण, पूर्व मन्त्री, सांसदहरु, नेपाल सरकारका विशिष्ठ अधिकारी, नेपाल स्थित विदेशी कूटनीतिक नियोगका प्रमुख तथा प्रतिनिधिहरुको सहभागिता थियो ।
त्यस अवसरमा राजदूत साइगोले जापान नेपाल सम्बन्धका विविध पक्षको चर्चा गर्नुभयो ।
उहाँले सम्राट नारुहितो सन् १९८७ मा नेपाल आउनुभएको प्रसंग उल्लेख गर्नुभयो । उहाँले जापान र नेपालका विदेशमन्त्रीहरुले हालैमात्र दुइ देशको आपसी भ्रमण गरेकोले सम्बन्ध थप उचाइमा पुगेको धारणा राख्नुभयो ।
राजदूत साइगोका अनुसार यही मे महिनामा सम्राट नारुहितोले गद्दी आरोहण गरेपछि जापानमा नयाँ युगको शुरुआत भएको भनी नयाँ युग समारोह मनाउन थालिएको छ ।
यस समारोहलाई रिवा भनिन्छ । रिवाको अर्थ एक राम्रो सौहार्दता भन्ने हुन्छ । यस अवसरमा नयाँ फूलहरु फूलाउने तथा सौहार्दता बढाउन सांस्कृतिक लगायतका कार्यक्रमहरु आयोजना गर्ने गरिन्छ ।
© 2023