बझाङ । जिल्लाको बुंगल नगरपालिका वडा नम्बर ७ मा शंकास्पद बस्तु फेला परेको छ ।
बुधबार बिहान वडा कार्यालयमा खतरा भनेर लेखिएको अवस्थामा शंकास्पद बस्तु फेला परेको हो ।
बझाङका सिडिओ सुरेश सुनारका अनुसार सदरमुकाम चैनपुरबाट सवारी साधनमा बुंगल नगरपालिका वडा नम्बर ७ मा पूग्न झण्डै ४ घण्टा लाग्छ ।
‘वडा कार्यालयमा शंकास्पद बस्तु राखिएको जानकारी प्राप्त भएको छ’, बझाङका सिडिओ सुनारले भने, ‘शंकास्पद बस्तु फेला परेको जानकारी आएपछि सो स्थानतिर नेपाली सेनाको बम डिस्पोजल टोली पठाइएको छ ।’२ साता अगाडि मात्र बझाङको छविस पाथिभेरा गाउँपालिका को कार्यालयमा राखिएको बम नेपाली सेनाले डिस्पोजल गरेको थियो ।
त्यस्तै हिजो जिल्ला मालपोत कार्यालय कैलालीको परिसरमा कालो भोलाभित्र बम फेला परेको थियो। बेराडाडीबाट आएको नेपाली सेनाको टोलीले मंगलबार बिहान करिब ७ बजे तिर फेला परेको बम निष्कृय पार्यो ।
जिल्ला प्रहरी कार्यालय कैलालीका प्रहरी निरीक्षक प्रकाश जाग्रीका अनुसार बम आफैँले बनाएको जस्तो रहेको र त्यसमा घडीसमेत राखिएकाले डिजिटलबम जस्तो नभएको बताए ।
प्रहरी निरीक्षक वकिल सिंहका अनुसार बम राति राखिएको बुझीएको छ । उनले भने, ‘बिहान शङ्कास्पद वस्तु भेटिएको हो।’ उनले नै शङ्कास्पद वस्तु फेला परेको भन्दै सेनालाई खबर गरेका हुन्।
पछिलो समय काठमाडौंको सुकेधारा र अनामनगर घट्टेकुलोमा भएको बम विस्फोटमा परि तीन जनाको मृत्यु भएसँगै प्रहरीले विप्लव समूहमाथि निगरानी बढाएको छ ।
