काठमाडौं । प्रधानमन्त्री केपी शर्मा ओलीलाई कोरियाको काङनाम विश्वविद्यालयले मानार्थ विद्यावारिधि (डाक्टर) को उपाधि प्रदान गरेको छ ।
बुधबार काठमाडौंको नेपाली सेनाको सानो भर्याङस्थित स्वास्थ्य विज्ञान संस्थानमा आयोजना भएको एक कार्यक्रममा दक्षिण कोरियाको काङनाम युनिभर्सिटीले प्रधानमन्त्री एवं त्रिभुवन विश्वविद्यालयका कुलपति प्रधानमन्त्री ओलीलाई उक्त उपाधि प्रदान गरेका हुन् ।
प्रधानमन्त्री ओलीले नेपालमा लोकतन्त्रका लागि उच्च योगदान गरेको भन्दै उक्त विश्वविद्यालयले सो उपाधि प्रदान गरेको प्रधानमन्त्रीको सचिवालयद्वारा प्रेसित समाचारमा जनाइएको छ ।
उपाधि ग्रहणपछि बोल्दै प्रधानमन्त्री ओलीले आफूले पाएको मानार्थ विद्यावारिधि कोरियाले सम्पूर्ण नेपालीलाईगरेको सम्मानका रुपमा लिएको बताए । उनले भने, ‘यो सम्मान मेरो व्यक्तिगत होइन, सम्पूर्ण नेपालीको सम्मान हो ।
कार्यक्रममा बोल्दै प्रधानमन्त्री ओलीले कोरियाको विकासबाट नेपालले धेरै कुरा सिक्न सक्ने बताएका छन् । प्रधानमन्त्री ओलीले नेपाल पनि अब छोटो समयमै विकसित हुने बताए ।
कार्यक्रममा सहभागी हुन काङनाम युनिभर्सिटीका प्रेसिडेन्ट सिनिल युन र त्रिभुवन विश्वविद्यालयका उपकुलपति तीर्थराज खनियाँले संयुक्त रुपमा आमन्त्रण गरेको थिए ।
उपाधि दिने संस्था क्रिश्चियन
विश्वविद्यालयले आफ्नो बारेमा वेभसाईटमा लेखेको छ हाम्रो यो शैक्षिक संस्थाको स्थापना ईसाई धर्मको भावना अनुसार १९४६ मा ग्योङ्गचेओन अर्थात् स्वर्ग र मानव जातिको पूजा गर्नको लागि खुलेको हो । जब जापानी उपनिवेश सकिएर गरिबी र विनाशबाट हामीले मुक्ति पायौं त्यसपछि खुलेको हामीले ७० औं वर्षगाँठ मनाइसकेका छौं ।
यसरी सोही कलेजेको वेभसाईटमा लेखिए अनुसार यो एउटा क्रिश्चियन धर्म प्रचारक विश्वविद्यालय हो । जसले क्रिश्चियन धर्मको भावना अनुसारको शिक्षा दिने गरेको छ । सोही विश्वविद्यालयबाट प्रधानमन्त्री ओलीले मानार्थ विद्यावारिधि लिन लागेका हुन् ।
प्रधानमन्त्रीले विवादास्पद विद्यावारिधि ग्रहण गरेको यो पहिलोपटक होइन । उनलाई २०६७ असोज ११ गते अमेरिकामा रहेको भनिएको ग्रिनफोर्ड युनिभर्सिटीले काठमाडौंमा विशेष दीक्षान्त समारोह आयोजना गरेको थियो ।
त्यस्तै गत चैत २५ गते राजकीय भ्रमणका लागि भारत गएका प्रधानमन्त्री ओलीलाई त्यहाँको उत्तराखण्डको एक विश्वविद्यालयले मानार्थ विद्यावारिधि प्रदान गर्यो । उत्तराखण्ड राज्यको पन्तनगरस्थित गोविन्द बल्लभ पन्त कृषि तथा प्रविधि विश्वविद्यालयले उनलाई ‘अनररी डक्टर अफ साइन्स’ (मानार्थ विद्यावारिधि) द्वारा विभूषित गरेको थियो ।
