काठमाडौं । प्रधानमन्त्री कप क्रिकेट प्रतियोगितामा प्रदेश दुईले पहिलो जित दर्ता गराएको छ ।
टियु क्रिकेट मैदानमा आज भएको खेलमा प्रदेश दुईले कर्णाली प्रदेशलाई ९ विकेटले पराजित गरेको हो । ९४ रनको सामान्य चनौती पछ्याउँदै ब्याटिङ गरेको प्रदेश दुईले १६ ओभरको समाप्तिमा एक विकेटको क्षतिमा लक्ष्य भेटायो ।
प्रदेश दुईको जितमा हरिशंकर शाहले अर्धशतकीय पारी खेले । उनले अविजित ५५ रन बनाए । त्यस्तै हसिम अन्सारीले १७ रन बनाउँदा रवि शाहले अविजित १६ रन बनाए ।
यसअघि टस जितेर पहिले ब्याटिङ गरेको कर्णाली प्रदेश ३०.४ ओभरमा ९३ रनमा समेटियो ।
कर्णालीका लागि प्रकाश जैसीले सर्वाधिक ३७ रन बनाउँदा कप्तान रविन्द्र शाहीले दोस्रो ठूलो स्कोरको रुपमा १४ रन बनाए । अन्य कुनै पनि ब्याट्सम्यानले दोहोरो अंकमा रन बनाउन सकेनन् ।
कर्णालीलाई सस्तैमा समेट्न प्रदेश २ का कुमार थापाले ३ विकेट लिँदा, रसिद खान,समसद शेख र हरिशंकर साहले समान २–२ विकेट हात पारे ।
यता अर्के खेलमा नेपाल पुलिस क्लबका अमित श्रेष्ठले शतक प्रहार गरेका छन् । मुलपानी मैदानमा भएको खेलमा अमितले प्रदेश १ विरुद्धको खेलमा शतक बनाएका हुन् ।
ओपनर पवन सर्राफको पहिलो विकेट गएपछि क्रिजमा आएका अमितले ११८ बलमा १०६ रनको योगदान दिए । उनले १५ चौका र एक छक्का प्रहार गर्दै सो योगफल तयार पारेका थिए ।
पुलिसको इनिङमा अन्य कनै पनि खेलाडीले राम्रो प्रदर्शन गर्न सकेनन् । ओपनर पवन १० रनमा आउट भए भने अर्का ओपनर अनिल कुमार शाह ४ रनमा, दिपेन्द्र सिंह ऐरी २, आरिफ शेख ४, दिलिप नाथ १, कुशल भुर्तेल २४, मञ्जित श्रेष्ठ ११, रामनरेश गरिी ११ र ललित नारायण राजवंशीले १ रनमात्र जोडे ।
पहिला ब्याटिङ गरेको पुलिसले प्रदेश १ लाई १८६ रनको लक्ष्य दिएको छ । ४३.१ ओभरमा सबै विकेट गुमाउँदै पुलिस १८५ रनमा सिमित भयो । बलिङतर्फ कमद खत्री, फिदोष अन्सारी, पुष्प थापा, दिपेश कँडेल र सिद्धान्त लोहनीले २–२ विकेट बाँढे ।
