जनकपुरधाम – धनुषाको मिथिला नगरपालिका ६ का सत्रुधन साहका अढाई वर्षीय छोरा आर्यन भनिने समिर साहलाई बलिको नाउँमा हत्या गर्ने झाँक्रीलाई प्रहरीले पक्राउ गरेको छ। गत वैशाख २३ गते हराएका आर्यनको शव वैशाख २४ गते बिहान स्थानीय कृष्णानन्दन महतोको बारीमा फेला परेको थियो।
जिल्ला प्रहरी कार्यालय धनुषा, प्रदेश प्रहरी र संघीय प्रहरी ईकाइले संयुक्त रूपमा ६५ जनासँग बयान लिएको आधारमा धामी झाँक्रीको कला सिक्दै आएका ५५ वर्षीय शत्रुधन महतोलाई पक्राउ गरेको हो। महतोको बयानको आधारमा बालक आर्यनको बलि सिद्धि प्राप्ति गर्ने नाउँमा हत्या गरिएको रहस्य खुलेको छ। बलि दिएपछि आफू शक्तिशाली हुने अन्धविश्वासमा हत्या गरिएको धनुषाका प्रहरी प्रमुख शेखर खनालले बताए।
प्रहरीले जेठ १५ गते महतोलाई उनकै घरबाटै पक्राउ गरेको हो । प्रहरीका अनुसार महतोको साथबाट एक थान धारिलो हतियार, आर्यनको हत्या गर्दा लगाएको गञ्जी, गम्छा र धोतीसमेत बरामद भएको छ ।
प्रहरीका अनुसार मृतक बालककी आमा रेणु देवी साह घाँस काट्न गएको मौका छोपेर घरमा खेलिरहेका आर्यनलाई महतोले फकाएर आफ्नो घर लगेका थिए ।
महतोले बालकको हत्यापछि शव घर पछाडि कृष्णनन्दन महतोको खेतको झाडीमा फालेका थिए ।आर्यन बिरामी हुँदासमेत झाक्री महतोले झारफुक गर्ने गरेका थिए। झाँक्रीको घर आर्यनको घरबाट सय मिटर टाढा छ। आर्यनका बुबा वैदेशिक रोजगारमा छन्। आर्यन एक्ला छोरा हुन्।
झाँक्री महतोमाथि अपहरण शरीर बन्धक राखी हत्या गरेको ज्यानसम्बन्धी मुद्दामा कार्वाही प्रक्रिया बढाइएको प्रहरी उपरीक्षक खनालले जानकारी दिए।
पक्राउ परेका महतोलाई धनुषा जिल्ला अदालतमा पेश गरी पहिलो पटक दिन ७ को म्याद थप गरिएको छ ।
अन्धविश्वासकै कारण उक्त घटना भएको प्रहरीको निष्कर्ष छ ।
