काठमाडौं । महानगरीय प्रहरी परिसर, काठमाडौंले जेठ महिनामा मात्रै काठमाडौंबाट ८२ जना पाकेटमारलाई पक्राउ गरेको छ ।
आइतवार प्रहरी परिसरले पत्रकार सम्मेलन गरी विभिन्न सार्वजनिक सवारी साधनमा चोरीको घटनामा संलग्न ८२ जनालाई सार्वजनिक गरेको हो ।
प्रहरीका अनुसार पक्राउ परेका सबैले सार्वजनिक यातायातमा विभिन्न कोड भाषा प्रयोग गरी पाकेट मार्ने गरेको जनाएको छ ।
”सार्वजनिक बसहरूमा पैसा भएको यात्रु पत्ता लगाइ अगाडि पछाडिबाट घेराबन्दीमा पारी ठेलमठेलको अवस्था बनाइ मौका छोपी मोबाइल, नगद र सुनचाँदी पकेट मारी पालोपालो गरी ओर्लने देखियो”, प्रवक्ता होविन्द्र बोगटीले भने ।
पक्राउ पर्नेहरूमा ७८ जना पुरुष र ४ जना महिला रहेका छन् । उनीहरूबाट छ लाखभन्दा बढी नगद, २१ थान मोबाइल र दुई थान ल्यापटप बरामद गरिएको छ ।
महानगरीय प्रहरी परिसर, काठमाडौंले एक महिना लामो अभियान सञ्चालन गरी पाकेटमारहरू नियन्त्रणमा लिएको कार्कीले बताए ।
