संयुक्तराज्य अमेरिकामा आँधी (टोर्नाडो) मा परेर ५० जनाभन्दा बढी व्यक्तिको ज्यान गएको छ । क्षतिको विवरण संकलन गरिरहेका अधिकारीहरुले केन्टकी राज्यमा मात्र १०० भन्दा बढी मानिसको मृत्यु हुन सक्ने बताएका छन् ।
अमेरिकाका दक्षिणी राज्य केन्टकीमा टोर्नाडोले सबैभन्दा बढी जनधनको क्षति पुगेको अमेरिकी अधिकारीहरुले बताएका छन् ।
समाचार संस्था एपीका अनुसार, शुक्रबार साँझ आएको शक्तिशाली टोर्नाडो र आँधीबेहरीले धेरै घर र सार्वजनिक स्थलहरुमा क्षति पुगेको छ । केन्टकी राज्यको इतिहासमा यो सबैभन्दा डरलाग्दो टोर्नाडो हो ।
मेफिल्डको एउटा कारखाना भत्किँदा त्यसभित्र रहेका दर्जनौं कामदारहरुको मृत्यु भएको आशंका गरिएको छ । त्यस कारखानामा १०० भन्दा बढी व्यक्ति रहेको अनुमान गरिएको छ ।
अन्य राज्यमा पनि जनधनको क्षति भएको छ । केन्टकी राज्यका गभर्नर एन्डी बेसियरले राज्यमा आपतकालको घोषणा गर्दै राहत र उद्धार कार्यलाई तिब्र बनाइएको बताएका छन् ।
प्रहरीका अनुसार राज्यको पश्चिमी क्षेत्रमा बहेको तिब्र बेगको हावाका कारण एउटा रेल पनि लिकबाट बाहिर गएको छ ।
अन्य राज्यहरु इलिनोइस, टेनिसी, अर्कान्सा लगायतका राज्यहरुमा पनि क्षति पुगेको प्रारम्भिक विवरणमा उल्लेख छ ।
