काठमाडौं । नेपाली कांग्रेसका सभापति एवम् प्रधानमन्त्री शेरबहादुर देउवाले गए राति पार्टीका वरिष्ट नेता रामचन्द्र पौडेललाई उहाँकै निवास बोहोराटारमा पुगेर भेट गर्नु भएको छ ।
महाधिवेशनमा अस्वस्थ प्रतिस्पर्धा र आफ्नो आदर्श विपरीत अस्वस्थ प्रतिस्पर्धा हुने देखेको भन्दै काँग्रेसका सबै राजनीतिक गतिविधिबाट आफूले विश्राम लिने बताएका पौडेलसँगको भेटघाटलाई अर्थपूर्ण रुपमा हेरिएको छ ।
दुई नेताबीच गएराति ९ बजेतिर भेटघाट भएको थियो ।
पौडेलको सचिवालयका अनुसार सभापति देउवाले राजनीतिबाट अलग हुने कुरामाथि पुनर्विचार गर्न आग्रह गर्नु भएको थियो ।
वरिष्ट नेता पौडेल सभापति देउवाका कट्टर आलोचक हुनुका साथै देउवाको विकल्प खोज्ने अभियानमा सक्रिय हुनुहुन्थ्यो । उहाँले संस्थापन इतर पक्षबाट सभापतिमा सर्वसम्मत उम्मेदवार हुने चाहना राखे पनि नेताहरु प्रकाशमान सिंह र डा शेखर कोइरालालाई सहमतिमा ल्याउन सक्नु भएको थिएन ।
